Aktivistë shqiptaro – amerikan takuan Ivanovin

Aktivistë të komunitetit shqiptar nga shtetet Illionis dhe Uiskonsin janë takuar dje në Çikago me presidentin e Maqedonisë, Gjorgje Ivanov dhe delegacionin shoqërues, ku mori pjesë edhe konsulli gjeneral i Maqedonisë në Çikago, Jakup Rexhepi. 

Shefi i këtij delegacioni të aktivistëve, Ilaz Kadriu informoi presidentin maqedonas me të  dhënat dhe kërkesat e komunitetit shqiptar nga Maqedonia që jeton dhe vepron në këto shtete. 

Ky takim ku moren pjesë edhe Musa Adili, Ismail Shabani, Xhavit Hamdija, Luan Elezi, Zaim Shaqiri, Hajdin Bajrami dhe Fanol Cami, është vlerësuar si i pari gjatë historisë së re dhe i vlefshëm për zgjidhjen eventuale të problemeve me anë të dialogut. 

Kadriu shtoi se Komuniteti Shqiptaro – Amerikan me vëmendje të posaçme po ndjek situatën në Maqedoni dhe sidomos incidentet e fundit pas rrahjeve nëpër autobus në Shkup, vrasjen në Gostivar dhe deri tek vrasja e pesëfishtë në rajonin e Shkupit, ku është kërkuar që të zbardhen këto raste dhe drejtësia pa ndikimin politik të jap fjalën  fundit dhe aktorët të dënohen sipas ligjit. 

“Në këtë takim është kërkuar që të amortizohen politikat e ashpra dhe të bëhen përpjekje për ndryshime rrënjësore të kushtetutës, e cila ligjërisht do ti barazonte maqedonët, shqiptarët, bullgarët, turqit, serbët, vllehët, grekët, romët e të gjithë të tjerët që jetojnë në Maqedoni. Ky potez do të ishte një element shumë pozitiv që do të çonte proceset përpara”, theksohet në komunikatën e lëshuar, duke shtuar se shqiptarët nuk duan të jenë zorrë qorre në Maqedoni.  

Lidhur me tentimet e Maqedonisë për inkuadrim ne NATO, zoti Kadriu theksoi se KSHA përpara dhe pas luftës në Kosovë ka angazhuar tërë potencialin politik dhe lobues për të inkuadruar administratën amerikane në zgjidhjen e çështjes së Kosovës gjeri në përdorimin e forcës.

“Aspak nuk është e rastit se shqiptarët janë miqtë më të ngushtë të Amerikës në Ballkan dhe tani këta janë të preferuarit e saj. Për ti vënë në lëvizje shqiptarët e Amerikës të lobojnë për pranimin e Maqedonisë në strukturat e NATO-s, Shkupi paraprakisht duhet të bëjë hapa konkrete në drejtim të ndryshimeve të lartëpërmendura kushtetuese. Dhe kjo jo vetëm me deklarime boshe, por me kryerjen  e obligimeve në një afat sa më të shkurtër”, thekson komunikata.

Pas tij, në bisedë  siç thuhet është kyçur edhe presidenti Ivanov i është i është shmangur përgjigjeve konkrete. Ai ka nënvizuar se ka mbetur edhe shumë për tu bërë në planin e demokratizimit në Maqedoni. Ivanov ka përmendur se pas zgjedhjes së tij si president, në kabinetin e tij ka përfshirë katër këshilltarë shqiptarë, prej gjithsejt 10 këshilltarë të kabinetit të tij. 

Ai ka përmendur përfaqësimin në polici, ndërmarrje dhe administratën shtetërore, por komuniteti i ka përmendur se ka mbi 140 institucione ku nuk ka asnjë shqiptarë. 

Ivanov ka theksuar se do të angazhohet me përpjekjet e tij ligjore për incidentet e fundit dhe kërkoi dënimin e autorëve të dhunës. Ai deklaratën e ministres së MPB-së, Jankullovska e ka vlerësuar si të ngutshme dhe të momentit jo të duhur. Ivanov në fund ftoi delegacionin që të vizitojë rezidencën e tij sa herë të jetë e mundur. 

“Me përshëndetje të ngrohta, përfundoi edhe takimi i parë në historinë e diasporës shqiptare me një president të Maqedonisë, dhe për këtë presidenti duhet të ketë kredi”, theksohet në komunikatën për media. 

Delegacioni i komunitetit i udhëhequr nga Ilaz Kadriu, Zaim Shaqiri, Musa Adili dhe Luan Elezi takuan edhe me ministrin e jashtëm turk Ahmet Davutoglu. Delegacioni kërkoi që Turqia të bëjë presione ndaj qeverive të Ballkanit për ndryshime kushtetuese dhe të raporteve. Me këtë KSHA në Çikago filloi edhe zyrtarisht te bashkëpunoje edhe me komunitetin dhe konsullatën turke. (INA)