Idrizaj dënohet për shkaktim të rrezikut të përgjithshëm

Rasti u ndjek penalisht nga një prokuror i EULEX-it nga Prokuroria e Qarkut në Pejë.

Një panel i përbërë prej dy gjykatësve të EULEX-it dhe një gjykatësi vendas nga Gjykata e Qarkut në Pejë, më 29 mars 2012 shpallën fajtor të pandehurin Dervish Idrizaj për veprën penale të shkaktimit të rrezikut të përgjithshëm. Ai u dënua me pesë vjet burg.

Trupi gjykues e shpalli Dervish Idrizajn fajtor sepse ai kishte shkrepur dy të shtëna në drejtim të një viktime në Deçan, duke mos e goditur atë, por dritaren dhe derën e supermarketit. Përkundër një numri të madh të njerëzve në afërsi, askush nuk ishte goditur drejtpërsëdrejti nga plumbat ose rikosheti i tyre. I pandehuri fillimisht ishte akuzuar për tentim-vrasje, e që më pas ishte riformuluar si shkaktim i rrezikut të përgjithshëm.

Trupi gjykues liroi Isuf Idrizajn dhe Bedri Krasniqin nga të gjitha akuzat, meqë provat nuk dëshmuan se ata kishin kryer veprat penale për të cilat ata ishin akuzuar.

Rasti u ndjek penalisht nga një prokuror i EULEX-it nga Prokuroria e Qarkut në Pejë. (INA)