Kuçi: ROSU nuk mund të kontrollohet nga askush

Zëvendëskryeministri i Kosovës, Hajredin Kuçi, ka mohuar raportimet e disa mediave që ROSU-ja është bastisur nga KFOR-i në Mitrovicë, duke thënë se do të kërkojë sqarim nga KFOR-i për informacionet që kanë dalë në media. 

Ai i ka siguruar të gjithë se ROSU-ja nuk mund të kontrollohet nga askush dhe ndonjë vendim të mundshëm për të intervenuar në veri nuk do të mund ta ndalte askush. Kuçi ka thënë pas mbledhje së Qeverisë se KFOR-i mund të jetë trembur pas zotimeve të Qeverisë për të vendosur rend dhe ligj në veri të Kosovësm, njofton KTV. 

Kryeministri i Kosovës, Hashim Thaçi, ka pohuar pas vizitës në SHBA se Kosova ka mbështetjen e fuqishme amerikane dhe zgjedhjet serbe nuk do të mbahen në Kosovë. Sipas tij, Qeveria ka kontaktuar organizatat ndërkombëtare dhe OSBE-në për zgjedhjet serbe, duke thënë se serbët me dyshtetësi mund të votojnë, por jo të organizohen zgjedhje në veri të Kosovës. (INA)