BE-ja Thaçit: Integrimi varet nga Kosova

Bashkimit Evropian nuk po i bëjnë shumë përshtypje kritikat e kryeministrit Hashim Thaçi. Unioni i 27 shteteve, pesë prej të cilave nuk e kanë njohur pavarësinë e Kosovës, ndien se ka bërë shumë investime dhe e ka përkrahur shtetin e ri. 

Zyrtarë të Zyrës së Bashkimit Evropian në Kosovë i ka thënë “Kohës Ditore” se dy proceset për të cilat po kritikon kryeministri Hasim Thaçi, varen nga rezultatet e institucioneve të Kosovës. Rezultatet e studimit të fizibilitetit do të tregojnë gjendjen reale të Kosovës, ndërkaq që edhe liberalizimi i vizave, pas dorëzimit të udhërrëfyesit që pritet të ndodhë së shpejti, do të varet krejtësisht nga puna e institucioneve të Kosovës. 

Sipas shefit të BE-së në Kosovë, Samuel Zhbogar, të dy proceset, edhe liberalizimi, edhe procesi i integrimit, kërkojnë reforma të mundimshme dhe me kosto politike.

Kosova, shteti më i ri në Evropë, ka misionin më të madh të BE-së, EULEX, i cili ndihmon autoritet e Kosovës në përmirësimin e sundimit të ligjit. E gjithë politika kosovare e sheh integrimin në Bashkimin Evropian si qëllim të përbashkët, por procedurat e ngadalta të anëtarësimit e edhe ato të liberalizimit të vizave kanë bërë që zërat për mostrajtim të drejtë nga BE-ja të rriten në shtetin që është edhe me i izoluari në Evropë. 

Kohëve të fundit, gjuhën kritike ndaj BE-së e ka kultivuar edhe kryeministri i vendit, Hashim Thaçi. Sipas tij, BE-ja po tregohet e ngadaltë karshi entuziazmit të kosovarëve për të qenë pjesë e BE-së. Përfaqësuesi i BE-së në Kosovë, në një bisedë për “Kohën Ditore”, ka thënë se gjithçka varet nga rezultatet e Kosovës. 

“Gjithkush duhet ta dijë se këto përpjekje janë të mundimshme dhe janë të kushtueshme në aspektin politik dhe institucional, si dhe kërkojnë reforma ekonomike. Të gjitha vendet kanë kaluar të njëjtin proces. Është një proces me kushte dhe progresi matet me rezultate konkrete”, ka thënë Zhbogar.

Kritikave për ngathtësi të Bashkimit Evropian u është bashkuar së fundi edhe raportuesja për Kosovën në Parlamentin Evropian, Ulrike Lunachek.