“Grand”-i i merret investitorëve

Agjencia Kosovare e Privatizimit vendosi ta ritenderojë Hotelin “Grand”. Ky vendim thuhet se u mor pasi blerësi ka dështuar të ofrojë garanci dhe siguri për investime, shkruan gazeta “Express”. 

Sipas gazetës, kështu Behgjet Pacolli, Remzi Ejupi, e Zylqif Berisha do t’i humbin 8.1 milionë euro, sa paguan për këtë hotel. 

Ejupi akuzoi kreun e AKP-së se ua mori hotelin nga duart pasi nuk ia dhanë rreth 4 milionë euro haraç.

Hoteli “Grand” përfundimisht i kthehet shtetit. Pas shumë vjet zvarritjesh, Agjencia Kosovare e Privatizimit vendosi që t’ia marrë aksionet pronarit Zylqif Berisha dhe ta përgatisë për ritenderim këtë ndërmarrje. Ky vendim thuhet se u mor pasi blerësi ka dështuar të ofrojë garanci dhe siguri për investime në hotelin më të madh ne Prishtinë.

Por, ata që i paguan 8.1 milionë euro për ta blerë këtë ndërmarrje gjashtë vjet më parë, thonë se problem nuk është garancia e investimeve, por korrupsioni i zyrtarëve të lartë të AKP-së.

Madje, Remzi Ejupi, bashkëpronar në Hotelin Grand, akuzon kreun e AKP-së, Dino Asanaj se ua mori hotelin nga duart, pasi nuk ia dhanë rreth 4 milionë euro haraç, sa i kishte kërkuar ai përmes ndërmjetësve të tij. “Na kemi tregu që presioni ka qenë. Herën e parë i kanë lyp 4 milionë euro, herën e dytë 3 milionë e gjysmë dhe nuk po më çudit fakti se kjo far pune ka qenë e pritshme. Ne ju kemi tregu qysh në fillim se nuk japim haraç”, pohon Ejupi. (INA)