NATO: Nuk tolerojmë dhunë në Kosovë

NATO sot ka shprehur shqetësime dhe zemërim lidhur me sulmin ndaj ushtarëve të KFOR-it nga ana e serbëve në veriun e Kosovës, duke paralajmëruar se nuk do të tolerojë dhunën.

“Thellësisht jemi të zemëruar për shkak të akteve të dhunës të drejtuara kundër ushtarëve tanë. Trupat tona veprojnë plotësisht në përputhje të mandatit të OKB-së”, theksoi zëvendës – zëdhënësja e NATO-s, Karmen Romero. 

Sipas saj, KFOR nuk do të tolerojë dhunë ndaj ushtarëve të saj, të cilët kanë të drejtën e vetëmbrojtjes. Ajo ka bërë thirrje për përmbajtje nga çdo aksion provokativ. 

KFOR njoftoi se dy ushtarë të tyre janë të plagosur rëndë nga sulmet e serbëve lokal, disa prej të cilëve kanë pasur edhe armë zjarri. (INA)

17: 34 - Së paku dy ushtarë të KFOR-it dhe katër serbë janë plagosur sot në veri të Mitrovicës gjatë përleshjeve mes KFOR-it dhe grupeve serbe tek barrikada në fshatin Rudar. Informacionet e fundit flasin për tërheqjen e trupave dhe transportuesve të KFOR-it, ndërsa disa nga serbët e arrestuar janë lënë të lirë. Situata është raportuar e qetë dhe se siç bëhet e ditur disa serb po ndjekin lëvizjet e trupave ndërkombëtare në rrugën Leposaviq - Rudarë. 

Deri tek përleshja ka ardhur, kur serbët kanë rezistuar përpjekjeve të KFOR-it për të hequr barrikadat në rrugën magjistrale Leposaviq – Rudarë. Plagosjen e ushtarëve e ka konfirmuar zëdhënësi i KFOR-it, Uve Novicki, i cili ka thënë se gjendja e tyre është stabile dhe jashtë rrezikut për jetën.

Ndërkaq, oficeri amerikan, Jozef Linch, ka thënë sot se ushtarët e KFOR-it do të shtinë me armë në serbët e grumbulluar, nëse ata do të gjuajnë me gurë pjesëtarët e KFOR-it, apo nëse vërehen armë në masën e grumbulluar, raporton gazeta serbe, “Blic”.

KFOR-i ka thënë nëpërmjet një komunikate për media se është duke kryer operacionin e largimit të bllokadave në rrugë në afërsi të Rudares. “KFOR-i ka vendosur disa pika të kontrollit të automjeteve dhe ka siguruar zonën për arsye të sigurisë. Kjo është e ndërlidhur me largimin e bllokadave në rrugë dhe është e përkohshme. Pas largimit të bllokadave në rrugë do të largohen edhe pikat e kontrollit të automjeteve dhe zona e sigurisë. Gjer tani nuk është raportuar asnjë incident, thuhet në komunikatën e KFOR-it.  

11:15 - Tensionet kanë shpërthyer sot në mëngjes në veriun e Kosovës, ku janë dëgjuar sirena dhe krisma armësh. Situata është tensionuar pas bllokadave të vendosura nga KFOR në rrugët që shpiejnë nga Zveçani për në fshatin Rudare dhe në lokacionin e njohur si “Dudin Krsh”. 

Sipas raporteve të mediave, bëhet e ditur për tre persona të plagosur nga armët e zjarrit, që janë dërguar në Spitalin e Mitrovicës. 

Mediat serbe raportojnë për persona të plagosur nga armët e zjarrit, që janë dëgjuar në disa drejtime. Forcat e KFOR-it kanë lejuar ndihmën e shpejtë që të futet në disa zona, për shkak të personave të plagosur. Në Zveçan akoma janë të lëshuar sirenat që thërrasin qytetarët në barrikada, ndërsa në qytetin e Mitrovicës dhe në disa pjesë janë dëgjuar edhe krisma armësh. 

Mësohet se KFOR ka përdorur gazë lotsjellës për të shpërndarë turmat serbe, të cilat janë përleshur me trupat ushtarake. 

KFOR gjithashtu edhe në urën e Ibrit që çon drejt Zveçanit kanë vendosur tela me gjemba dhe kanë bllokuar qarkullimin të këmbësorëve dhe makinave. Në pjesën veriore po vijojnë të fluturojnë helikopterë të forcave të KFOR-it, ndërsa situata vazhdon të tensionohet.

KFOR: Operacioni për heqjen e barrikadave

KFOR përmes një komunikate sot në mëngjes ka informuar se ka nisur një operacion për tërheqjen e barrikadave në rrethinën e Rudares, me qëllim të lëvizjes së lirë të qytetarëve. 

“Nga ora 08.40, KFOR po realizon operacionin për heqjen e barrikadave në rrethinën e Rudares. Ky aktivitet ka për qëllim që të mundësojë lëvizjen e lirë jo vetëm për KFOR-in, por edhe për organizatat e tjera ndërkombëtare dhe qytetarët e Kosovës”, thuhet në komunikatën e KFOR-it. 

KFOR bën të ditur se ka vendosur disa pika kontrolli dhe zona sigurie për shkaqe sigurie, duke shtuar se bëhet fjalë për një operacion dhe masa për heqjen e barrikadave. 

Në komunikatën e parë të KFOR-it nuk komunikohet për incidente dhe se bëhet e qartë se KFOR po kontribuon për masat e sigurisë dhe lëvizjen e lirë për të gjithë qytetarët e KFOR-it. 

Autoritetet ilegale serbe në veri kanë akuzuar KFOR-in amerikan për ndërmarrjen e këtij aksioni. Dragisha Miloviq, përfaqësues i serbëve lokal ka theksuar për Tanjug se KFOR po provokon situatën dhe pastaj të shpallë fajtorë serbët. Ai i ka apeluar bashkëqytetarëve të tij të jenë të qetë dhe ti shmangen dhunës dhe sulmeve ndaj KFOR-it. 

Operacioni pas sulmit të EULEX