Kryeqyteti kosovar pa infrastrukturë për biçiklistë

Me vetëm një shteg biçiklistësh në kryeqytet, policët e trafikut në Prishtinë nuk i ka penguar ky fakt që dy ditë më parë t`ia tërheqin vërejtjen një ngasësi biçiklete se mund të dënohet shkaku i ngasjes “në vend joadekuat”, në afërsi të hotelit Grand. 

”Derisa po biçikloja më ndaloi njëri prej katër pjesëtarëve të Policisë së Kosovës që gjendeshin para hotelit, të cilët më kërkuan letërnjoftimin dhe pasi ja dhashë e pyeta pse?. Më tha se s'kam të drejtë ta ngasë biçikletën ku nuk ka shtigje për biçikletë, s'kam të drejtë ta ngase biçikletën pa helmetë dhe s'kam të drejtë për asnjë moment t'i heq duart nga timoni", ka rrëfyer të enjten  Shkëlzen Gashi.

Më pas, ai është dërguar në stacion policor ku i janë numëruar të njëjta arsye, sikurse gjatë ndalimit në rrugë.

”Më mori në stacionin policor në qendër dhe atje nxori një ligj a rregullore dhe i lexoi gjërat që m'i tha para hotelit.

Për tri shkeljet, sipas tij, duhet të dënohesha nga 25 euro”, ka shtuar ai. Gashi ka pohuar t`i ketë thënë policit ta dënonte në bazë të ligjit që përmendte.

”I thashë nëse ligji thotë ashtu më dëno, por për shkeljen e parë ankohem në Komunën e Prishtinës”. Por, polici nuk e kishte dënuar me arsyetimin se nuk kishte dënuar asnjëherë biçiklistë.

”Nuk kam dënuar asnjëherë biçiklistë, e po më vjen keq", ka cituar Gashi, policin. 

Por, në Policinë e Kosovës nuk dinë për këtë rast. Pohojnë të mos jetë evidentuar. 

”Policia  i ka detyrat e veta dhe biçiklisti po ashtu duhet t`i dijë rregullat e veta kur del në komunikacion, përndryshe unë nuk paskam dëgjuar për këtë rast, që faktikisht nuk mund të quhet rast”, ka thënë zëdhënësi i Policisë së Kosovës për Rajonin e Prishtinës Agron Borovci.

Por, Shkëlzen Gashi ka theksuar se nga ky rast ka ndërmend t`i propozojë komunës një plan për shtigje biçiklistët në kryeqytet.

“Kjo më vetëdijesoi që sa më parë, bashkë me biçiklistët tjerë, profesioniste dhe joprofesionistë, por pasionant të biçiklizmit sikur puna ime, ta hartojmë një planprojekt që ta bëjmë Prishtinën qytet me shtigje për biçikleta dhe t'ia dërgojmë Kryetarit të Komunës së Prishtinës, dr. Isa Mustafa”, ka thënë ai, duke fajësuar Komunën për mosrealizimin e shtigjeve për biçiklistët.

”Prishtina është i vetmi kryeqytet në Evropë qe s'ka shtigje për biçiklistë dhe kjo mund të behet madje me shumë pak mjete, të cilat nuk mungojnë, por duhet vullnet, sepse kur ka vullnet, ka mundësi”, është shprehur Gashi.

Këtë fakt e pranojnë edhe vet zyrtarët komunalë, mirëpo sipas tyre ndërtimi i shtigjeve nuk ka mundur të bëhet si pasojë e mungesës së kushteve. 

“Komuna e Prishtinës, gjatë ndërtimit të rrugëve të reja në qytet, aty ku kanë lejuar kushtet e terrenit, dhe te pronësisë ka paraparë edhe ndërtimin e shiritit të biçiklistëve, shembull i mirë në këtë rast është rruga B në lagjen e Spitalit”, ka thënë zëdhënësi i komunës Asdren Osaj. Ai ka bërë të ditur se ndërtimi i shtigjeve për biçiklistë është në agjendën e komunës.

”Komuna ka plane të ndërtojë shtigje për biçiklistët në rrugën B ndërtimi i së cilës vazhdon ende dhe sa herë të ndërtohen rrugë të reja do të shqyrtohet mundësia edhe e ndërtimit të shtigjeve për biçiklistë”, ka shtuar ai.

Ndryshe, statistikat e Policisë dëshmojnë se gjatë periudhës janar-maj, janë shqiptuar rreth 30 mijë tiketa për kundërvajtje në trafik, prej tyre afro 300 janë shqiptuar ndaj këmbësorëve për mosrespektim të shenjave të komunikacionit. (KD/INA)