Fundi i UNMIK-ut në Kosovë

Gazeta e përditshme “Zëri” në Prishtinë shkruan sot se Qeveria e Kosovës, ICO dhe UNMIK-u janë duke punuar në kuadër të komisioneve të përbashkëta që dosjet me të cilat ka punuar UNMIK-u në veri të kalojnë në Zyrën e re Administrative të Kosovës.

Kjo e fundit ende nuk është tërësisht funksionale pasi është në pritje të emërimit të stafit, për çka ka pasur interesim nga serbët dhe shqiptarët. Sidoqoftë, vendimi i qeverisë kosovare ka nxitur negociata që prania ekzekutive e UNMIK-ut në veri të marrë fund përfundimisht.

UNMIK-u nuk ka pranuar të komentojë këtë informatë. “Është shumë herët për t’u përgjigjur në pyetjet tuaja”, ka thënë për “Zëri”, Oliver Salgado, shefi i Zyrës për informim i UNMIK-ut në Prishtinë.

Ministrja në Qeverinë e Kosovës, Vlora Çitaku, ka thënë se tashmë po diskutohet marrja e dokumentacionit me të cilin ka punuar UNMIK-u prej kohës kur këtë zyrë e hapi kryeadministratori Michael Steiner.

“Normalisht kjo zyrë kur është hapur në kohën e shefit të UNMIK-ut, Michael Steiner, është paraparë si zyrë e përkohshme, deri në momentin kur institucionet e Kosovës të jenë në gjendje të krijojnë mekanizmat e saj atje. Ky ka qenë një vendim i pritshëm edhe nga ana e UNMIK-ut, normalisht ajo zyrë atje me funksionalizimin e zyrës tonë nuk ka nevojë që të vazhdojë punën”, ka thënë ministrja Çitaku. (INA)