Blair: Shteti i fortë zgjidh veriun

Një ndër burrështetasit më meritorë për çlirimin e Kosovës, ish-kryeministri britanik Tony Blair, ka qëndruar të hënën në Prishtinë, për të kërkuar zhvillim ekonomik dhe sundim të ligjit në shtetin e shpallur katër vjet më parë. 

“E di që nuk është e lehtë, por varet nga ju. Sa më shumë që të zhvilloheni ekonomikisht dhe të keni sundim të ligjit, do të kuptoheni më mirë nga të tjerët”, ka thënë njeriu që bashkë me ish-presidentin amerikan, Bill Clinton, patën vendosur në vitin 1999 ta bombardonin ish-Jugosllavinë e Milosheviqit, për të shpëtuar nga gjenocidi shqiptarët e Kosovës.

Ish-kryeministri britanik, emrin e të cilit  e mbajnë dhjetëra të rinj kosovarë të lindur në kohën e luftës, ka folur për rininë e Kosovës dhe ka thënë se e ardhmja e saj do të jetë e sigurt vetëm nëse ka zhvillim ekonomik.

Blair ka thënë se i kupton vështirësitë që Kosova ka me çështjen e njohjeve, apo me sovranitetin në veri, por, sipas tij, këto probleme zgjidhen më lehtë nëse ka zhvillim ekonomik. 

“Sa më i fortë që të bëhet shteti, aq më e lehtë do të bëhet zgjidhja e këtij problemi (veriut v.j.), ka thënë Blair. “Duhet ta bëni punën tuaj për të vendosur vendin tuaj në pozitën më të mirë të mundshme. Ekonomia, sundimi i ligjit, dhe këtë po përpiqeni ta bëni. Sa më shumë ta ndërtoni Kosovën nga brenda, aq më shumë vëmendje do të merrni nga jashtë. Ky është mësimi politik”, ka thënë ish-kryeministri britanik. (INA)