Bukoshi e Haraqija do të largohen nga Qeveria

Burime të afërta me kryeministrin kanë thënë se për shkak të aktakuzave të ngritura nga Prokuroria, Bujar Bukoshi dhe Astrit Haraqija do të shkarkohen nga detyrat përkatëse që mbajnë në ekzekutivin kosovar. Vetë Bukoshi nuk e ka përjashtuar dorëheqjen, derisa Haraqija e ka përjashtuar këtë.

Dy anëtarët e listës “Ibrahim Rugova” që udhëhiqet nga Ukë Rugova, i cili me një mandat deputeti ka arritur t’i marrë tri pozita të larta në Qeveri në kuadër të koalicionit qeverisës akuzohen nga Prokuroria Speciale e Kosovës dhe ajo e Qarkut të Prishtinës për shpërdorim të detyrës zyrtare. Njëri për veprimet që po cilësohen kriminale për punën në krye të Ministrisë së Shëndetësisë, e tjetri për ato në Ministrinë e Kulturës, të Rinisë dhe të Sporteve. (KD/INA)