Autostrada për Shkup ndërtohet nëse ka buxhet

Ministri i Financave, Bedri Hamza, ka thënë të mërkurën se janë duke u bërë të gjitha përgatitjet për fillimin e ndërtimit të autostradës në drejtim të Shkupit, vitin e ardhshëm. Por ky projekt, sipas tij, nuk mund të nisë nëse nuk ka burime të mjaftueshme për ndërtimin e saj dhe nëse nuk ka një stabilitet të qëndrueshëm makrofiskal, shkruan sot “Koha Ditore”.

“Ne do të sigurohemi fillimisht se kemi burime të mjaftueshme për financim dhe stabilitet të qëndrueshëm makrofiskal e pastaj të fillojmë me realizimin e projektit”, tha ministri Hamza.

Sipas tij, qëndrueshmëria makrofiskale tashmë është siguruar, por burime të mjaftueshme për financimin e projektit ende nuk janë siguruar. Ministria ende nuk ka ndonjë plan për mënyrën e financimit të kësaj rruge.

Se qëndrueshmëria makrofiskale tashmë është siguruar, sipas tij, flet dëshmia e ardhur nga Fondi Monetar Ndërkombëtar, i cili në bazë të përmbushjes së kushteve të parapara, ka alokuar edhe 48 milionë euro në buxhetin Kosovës si kredi të buta.

Mjetet e FMN-së, të miratuara së fundi nga kjo organizatë, do të jenë pjesë e buxhetit që do të dedikohen për likuiditet bankar.

“Si rezultat i përmbushjes së suksesshme të reformave, dje Bordi i FMN-së ka aprovuar disbursimin e këstit të dytë të kredisë prej 48 milionë eurove dhe ne presim që deri në fund të vitit, të kemi disbursimin edhe të një shume prej mbi 40 milionë eurosh”, tha ministri Hamza.

Sipas tij, kjo tregon një arritje të mirë për vendin, por mesazh edhe më i rëndësishëm është vazhdimi politikave reformuese të Kosovës dhe vlerësimi pozitiv nga ana e FMN-së.

“Raporti i fundit i FMN-së dhe vlerësimi i Bordit Ekzekutiv dëshmon se ekonomia e Kosovës ka vazhduar me ritmet e saj pozitive të rritjes, pavarësisht krizës së disa vendeve të Eurozonës”, ka theksuar ministri Hamza.

Kjo është një kredi e butë që fillon ta paguajë pas tre vjetësh. Me këtë shumë  mjetesh Kosova ka ngritur borxhet publike në 5.5 për qind e GDP-së, por që vazhdon të jetë ndër më të voglat në rajon. Ministri Hamza ka deklaruar po ashtu se privatizimi i PTK-së për këtë vit nuk është kriter i FMN-së. Ai ka thënë se kriter nga FMN për PTK-në, është shpallja e interesit për privatizim deri në fund të muajit gusht të këtij viti, por jo edhe shitja e saj.

“Mjetet e FMN-së janë në harmoni me parashikimet tona, politikat makroekonomike dhe fiskale janë vlerësuar pozitivisht nga FMN-ja, duke qenë se ruajtja e stabilitetit makroekonomik ashtu siç kemi deklaruar shumë herë deri më tani mbetet top prioritet yni”, theksoi ministri Hamza. (KD/INA)