BFI alarmon ndërkombëtarët për kthimin e pronave

Kryetari i Bashkësisë Fetare Islame të Maqedonisë, Reis ul Ulemasë , H. Sulejman ef. Rexhepi sot ka pritur ambasadoren e Holandës, Marriet Schurman, takim i cili u realizua në bazë të kërkesës së Ambasadores në fjalë.

Kreu i BFI i prezentoi një letërnjoftim të institucionit të BFI dhe formën apo infrastrukturën e organizimit të BFI duke filluar nga këshilli i xhamisë e deri te Kuvendi i BFI-së, realitetin e enteve të institucioneve edukativo-arsimore, fondacioneve tjera të cilat veprojnë në kuadër të BFI, e sidomos OH “Hilal”. 

“Myslimanët e Maqedonisë janë autokton dhe se jeta fetare islame kultivohet institucionalisht më tepër se 600 vjet dhe se interpretimi i Islamit bëhet në mënyrë autentike dhe nuk jemi nën ndikimin e askujt nga jasht. Jemi institucion multinacional autonom dhe me të gjithë bashkësitë tjera fetare dhe subjekte të ndryshme bashkëpunojmë mbi  parimin e respektit reciprok. BFI dëshiron që shteti të respekton kushtetutën e vendit dhe Bashkësitë Fetare t’i sheh dhe t’i trajton të barabarta para ligjit”, theksoi kreu i BFI-së. 

Ai shtoi se BFI është kundër favorizimit të një bashkësie në disfavor të të tjerave bashkësi fetare. 

“Jemi të pakënaqur me neglizhencën e organeve qeveritare sa i përket kthimit të pronave të BFI, mendojm se nuk ka arsye juridike por krejt kjo bëhet  nga barrierat politike. Kërkojmë prej jush dhe prej mbarë faktorit relevant ndërkombëtar të akredituar në Maqedoni që pushtetit t’i bëhet presion për kthimin e pronave. Sepse vazhdon zullumi i vjetër mbi Bashkësinë Islame”, theksoi Reis ul Ulema, H.Sulejman ef. Rexhepi.  

Nga ana tjetër, ambasadorja Schurman falënderoi Reis ul Ulemanë për takimin e realizuar. Ajo  tregoi realitetin dhe pozicion e bashkësive Fetare në Holandë dhe se u zotua që në takimet e saja me faktorin e brendshëm relevant do të bisedon dhe insiston që të vijnë në shprehje veprimi juridik në Maqedoni dhe mos të dëmtohet askush, sidomos diskriminimi të mos ketë vend në këtë shtet multietnik dhe multikonfesional , ngase perspektiva mund të jetë shumë e hidhur. (INA)