Shënohet “Dita e dallimeve” në Tetovë

Me një prezantim të shumëllojshëm të ushqimeve tradicionale dhe një program të pasur artistik, të martën, shoqata “Multikultura” ka shënuar “Ditën e dallimeve”. 

Kryetari i komunës së Tetovës, Prof.Dr. Sadi Bexheti, ka theksuar se “Dita e dallimeve” është një ngjarje që organizohet nga shoqata “Multikultura” dhe përfshinë një sërë aktivitetesh që mundësojnë të njihemi me kulturat e ndryshme në qytetin tonë.

“I përgëzoj organizatorët për këtë ngjarje që shpalon pasurinë e shumëllojshme kulturore dhe që kultivon dallimet si një vlerë shoqërore”, tha ai.

Sipas tij, prezantimi i ushqimeve tradicionale si një segment i rëndësishëm i pasurisë kulturore paraqet një mundësi për të njohur traditën e begatshme të gatimit në qytetin tonë. 

“Komuna e Tetovës fuqimisht i mbështet aktivitetet që pasurojnë diversitetin kulturor dhe që promovojnë njohjen dhe respektin e ndersjellë si një vlerë që zhvillon klimën e mirëbesimit dhe bashkëjetesës”, tha kryetari Bexheti.

Organizata të shumta nga Tetova, në Qendrën e Kulturës në Tetovë kanë prezantuar materiale promovuese. Kjo ngjarje është përcjellë edhe me një program të pasur artistik të shoqërive kulturore nga Tetova.(INA)