Zv/kryeministrja Arifi në Madrid nuk përmend Kosovën

Zëvendëskryeministrja për evrointegrime e Maqedonisë, Teuta Arifi sot në Madrid nuk ka diskutuar njohjen e Kosovës nga shteti spanjoll, pasi që Spanja është një nga vendet e BE-së që nuk ka njohur akoma pavarësinë e Kosovës.

Burime pranë partisë shqiptare në pushtet BDI kanë theksuar se zëvendëskryeministrja Arifi duhet të shfrytëzojë këtë vizitë, për të sqaruar dhe arsyetuar njohjen që duhet të bëjë Spanja për shtetin e ri të Kosovës dhe se kjo njohje do të ndikojë në stabilitetin e vendeve të rajonit, me theks të veçantë edhe Maqedonisë. 

Dr.Teuta Arifi sot u takua me sekretarin shtetëror për BE në Ministrinë për Punë të Jashtme të Spanjës si dhe me anëtarët e Komitetit të përhershëm për politikë të jashtme dhe anëtarët e Komisionit të përgjithshëm për BE në Kongresin e Deputetëve.

Në komunikatën zyrtare thuhet se gjatë takimit zëvendëskryeministrja Arifi informoi për aktivitetet dhe realizimin e proceseve reformuese në vend, veçanërisht në fushat kyçe , siç janë gjyqësori, administrata publike, liria e të shprehurit dhe fusha të tjera. 

Në kuadër të kësaj, Arifi theksoi edhe rëndësinë e Dialogut Aderues të Nivelit të Lartë, si dhe Dialogun Teknik për kapitujt 23 dhe 24, të cilët paraqesin një stimul më shumë për realizimin e aktiviteteve të agjendës evropiane. 

Në këto takime u bisedua edhe për situatën në rajon, bashkëpunimin rajonal, si dhe marrëdhëniet me fqinjët, duke u theksuar se bashkëpunimi rajonal ka rëndësi të veçantë në përparimin e vendeve të rajonit në përgjithësi. (INA)