"Monstër" rikthehet në debat parlamentar

Operacioni policor "Monstër" ka qenë në qendër të vëmendjes së seancës së sotme parlamentare të pyetjeve të deputetëve.

Deputeti i PDSH-së, Imer Aliu ka kërkuar përgjegjësi dhe llogari nga ministrja e MPB-së, Gordana Jankullovska lidhur me të arrestuarit dhe të paraburgosurit e këtij rasti, duke përfshirë rastin e të zhdukurit për gjashtë ditë të Haki Hazirit, tashmë i paraburgosur në Manastir dhe brutalitetin ndaj femrave të ndaluara shqiptare nga njësitet speciale në korridoret e gjykatës. 

“Gjashtë ditë familja dhe opinioni nuk kanë ditur se ku ishte Haki Aziri, ju e arrestuat  dhe çfarë ndodhi pastaj, në burg sekrete, në uikend shtëpiza, ku janë ata. Ju sot duhet të prezantoni fakte. Ne jemi përfaqësuesit e atyre ët cilët ju i arrestuat, i baltosët i njollosët me lloj e lloj dezinformatash. Ti do të japësh përgjigje, ku ishte ky person gjashtë ditë, ti duhet të japësh përgjigje pse gruaja nga Haraçina u rrah në korridor të gjykatës, nga ana e policëve, kush janë ata policë. Kaloj një muaj dhe ti s’ke përgjigje, pastaj njëjtë edhe në burg, çdo ditë po rrihen të arrestuarit”, deklaroi shefi i grupit parlamentar të PDSH-së, Imer Aliu. 

Nga ana e saj, ministrja e MPB-së, Jankullovska ka theksuar se gjatë këtij aksioni janë respektuar të gjitha standardet profesionale dhe rregullat e sjelljes së policëve. Ajo ka shtuar se deputeti Aliu po tenton të manipulojë me të dhënat lidhur me operacionin "Monstër". 

“Procedura para hetimore është kryer dhe në bazë të atij para-hetimi është ngritur padi penale për terrorizëm  dhe ne nuk kemi arsye të fshehim se kemi siguruar argumente të cilat ia kemi dorëzuar Prokurorit përgjegjës", theksoi Jankullovska. 

Debati ka kulmuar kur ministrja Jankullovska i ka thënë deputetit Aliu që të ketë kujdes se çfarë deklarohet. "Unë punoj në interes të Republikës së Maqedonisë, por nuk e dij se për çfarë interesa ju punoni. Kujdes se çfarë flisni dhe respektoni ligjet", deklaroi Jankullovska. 

Ndërkohë, përgjigja e deputetit të PDSH-së ka qenë se nuk mund ta kërcënojë ate dhe se ajo duhet të përgjigjet për të paraburgosurit që siç u shpreh po mbahen si pengje dhe janë të rrahur. 

"Mos u nervikosni, bëhuni e qetë. Mua nuk mund të më kërcënoheni, për shkak se nuk jam pjesë e atij grupi servil të shqiptarëve që janë pranë jush", u përgjigj deputeti dhe nënkryetari i PDSH-së, Imer Aliu. 

Në seancën pyetje të deputetëve janë parashtruar pyetje edhe lidhur me zhvillimet e fundit politike dhe të sigurisë, dështimin nga Samiti i ]ikagos dhe kërkesa për përgjegjësinë e Qeverisë lidhur me bllokimin e proceseve evrointegruese. (INA)