Komuna e Sarajit binjakëzim me komunën turke Uskudar

Komuna e Sarajit e Shkupit si dhe komuna e Uskudarit nga Turqia sot nënshkruajtën marrëveshjen e binjakëzimit. 

Delegacioni nga Turqia i përbërë nga afaristë turk dhe shqiptarë kanë shqyrtuar mundësinë e investimeve në këtë komunë periferike të Shkupit. 

Marrëveshja e firmosur për binjakëzim parasheh kushte lehtësuese për investime si dhe stimulim të bizneseve, por edhe bashkëpunim në sfera tjera. 

“Binjakëzimi është një hapë i rëndësishëm në përafrimin e dy popujve duke këmbyer përvojat tona me komunën eUskudarit në disa fusha, dhe deri tani është dëshmuar i suksesshëm. Ne nuk dyshojmë se kjo marrëveshje do të sjellë rezultate në shumë sfera”, theksoi kryetari i komunës, Bekim Murati.  

Sipas tij, Korridori 8 ndodhet afër Komunës së Sarajit dh është një mundësi e mirë infrastrukturore për investitorët e huaj, pa përjashtuar kompanitë nga Turqia. 

Kryetari i Komunës së Uskudarit, Mustafa Kara ka shprehur mirënjohje për mikpritjen e organizuar, duke shtuar se do të promovojë komunën shqiptare para afaristëve të mirënjohur turq. Delegacioni nga Turqia ka vizituar parkun e Sarajit, kanjonin Matka dhe lokacione të tjera të pasura të kësaj komune. (INA)