Volers i impresionuar nga mikëpritja e dibranëve

Ambasadori amerikan Pol Volers ka qëndruar sot për vizitë në komunën e Dibrës. 

Ai ka zhvilluar takime me drejtuesit e pushtetit lokal, përfaqësuesit e komunitetit fetar islam dhe ortodoks si dhe ka bërë një vizitë në fabrikën e prodhimit të gipsit “Knauf”. 

Ambasadori Volers ka theksuar se është i kënaqur nga kjo vizitë, duke u njohur me kapacitetet institucionale, private si dhe jetën shoqërore dhe të komuniteteve etnike dhe fetare në këtë komunë. 

“Kemi folur për projekte të shumta që janë të financuara nga ana e USAID, si dhe drejtim të vazhdimit të bashkëpunimit përmes programeve tjera”, ka theksuar ambasadori amerikan pas takimit me kryetarin e komunës së Dibrës, Argëtim Fida. 

Nga ana tjetër, kryetari Fida bëri të ditur se ka informuar ambasadorin Volers për projektet dhe gjendjen e pushtetit lokal. 

“Për ne është një nder i madh vizita e mikut tonë më të madh, ambasadorit Pol Volers. Kemi biseduar edhe për mundësitë e investimeve të diasporës sonë në SHBA në vendlindjen e tyre”, deklaroi kryetari Fida. (INA)