Zjarrfikësit shpëtojnë mjellmat

Pjesëtarët e Njësisë territoriale të zjarrfikësve nga Struga, me ndihmën edhe të qytetarëve, kanë ndërmarrë një aksion për të ndihmuar e shpëtuar mjellmat që depërtojnë nga ujërat e Liqenit të Ohrit, në lumin Drin.

Në kërkim të ushqimit, çiftet e mjellmave së bashku me mjellmat e vogla-pasardhëset e tyre- jo rrallë nga ujërat e Liqenit të Ohrit, depërtojnë në lumin Drin, duke shfrytëzuar rrjedhën e lumit nga liqeni, por hasin në vështërsi që sërish të kthehen në hapësirat e Liqenit të Ohrit. Pengesë e pakalueshme është pikërisht rrjedha dhe rrëpishmëria e ujit që ndahet në portat e shkarkimit të Liqenit të Ohrit në lumin Drin. Për shkak të këtyre pengesave natyrore, mjellmat mbeten në Drin, dhe shpëtimi i vetëm është intervenimi i ekipeve të specializuara për kapjen (që nuk është aq e lehtë) dhe transferimin fizik në ujërat e Liqenit të Ohrit.

Një aksion i tillë i pjesëtarëve të Njësisë territoriale të zjarrfikësve është zhvilluar edhe sot (krahas atyre të ditëve më parë), që kanë shpëtuar një çift mjellmash së bashku me zogjtë e tyre, mjellmat e vogla. Ky aksion ka zgjuar kureshtjen e shumë qytetarëve, kalimtarëve të rastit dhe mysafirëve që aktualisht ndodhen në Strugë. (INA)