Ibrahimi: Komiteti për Marrëdhënie Ndëretnike dekor i Parlamentit

Deputeti i Partisë Demokratike Shqiptare (PDSH), Orhan Ibrahimi duke hedhur kritika në adresë të BDI-së deklaroi se Komiteti për Marrëdhënie Ndëretnike është dekor i Parlamentit të Republikës së Maqedonisë.

“Sot ishim dëshmitarë të një turpi tjetër të BDI-së. Deputetet e kësaj partie, dje vet konvokuan mbledhje të Komitetit për Marrëdhënie Ndëretnike dhe të njëjtët sot e bllokuan mbledhjen duke mos marrë pjesë në këtë mbledhje dhe duke mos u siguruar kuorumi i nevojshëm”, deklaroi Ibrahimi. 

Ai tha se, gjatë katër viteve të qeverisjes VMRO-BDI shqiptarët u maltretuan, u burgosën, u tortoruan, u kidnapuan dhe u vranë, ndërsa BDI-ja asnjëherë nuk e pa të arsyeshme që Komiteti të debatojë në lidhje me këtë terror dhe dhunë. 

“Përkujtojmë: egezekutimin e Harun Aliut me shokë, ligjin për natalitet vetëm për gratë maqedonase, maqedonishtja nga klasa e parë, Shkupi 2014, kisha në Kala, rrahja e shqiptarëve në Nerez, ulurimat dhe ofendimet antishqiptare të tifozëve maqedonas, Vevçani, vrasja e dy të rinjve në Gostivar, rrahja e nxënësve shqiptarë dhe së fundi akcioni policor "Monstra". Për asnjërën nga këto raste BDI-ja nuk e pa të arsyeshme që të trajtohet në këtë Komitet”, shtoi deputeti i PDSH. (INA)