DR: Qeveria VMRO-DPMNE dhe BDI aleanca ruso - aziatike

Demokracia e Re (DR) ka reaguar kundër prioriteteve të fundit dhe proklamimit të vizitave dhe fushatave për lidhjet dhe zgjerimin e marrëdhënieve si[ thuhet me aleancat ruso - aziatike. 

"Maqedonia si duket është e vendosur që me politikat e saja të jashtme të largohet gjithnjë e më shumë nga integrimet euro-atlantike  dhe të afrohet drejt atyre  ruso- aziatike, ndërsa me politikat dhe veprimet  e mbrendshme me hapa të shpejtë  të zhytet drejt situatave konfliktuoze të karakterit nacional dhe fetar. Treguesi më i mirë i të parës është prirja  gjithnjë e më e madhe e kryeministrit dhe kabinetit të tij për takime, vizita dhe kontakte me vendet e lartëpërmendura ndërsa i të dytës ngjarjet gjithnjë e më të shpeshta të fokusuara kundër qytetarëve shqiptar", thekson Demokracia e Re.

Kjo parti ka shprehur shqetësime edhe për politikat e brendshme dhe heshtjen e problematikave. 

"Ka kohë që shfryerjet antishqiptare të  huliganëve  ( politik)  maqedonas të sponzoruara nga qeveria maqedonase janë bërë refren i zakonshëm në çdo ndeshje sportive. Vrasja e të rinjve shqiptar nga personat zyrtar të ministrisë së punëve të mbrendshme jo vetëm që kalojnë në heshtje por edhe përpiqen të mbrohen dhe arsyetohen nga po ky institucion. Ndonëse kaluan dy muaj nga arestimi i personave të akuzuar si autorë të vrasjes në Smilkovc,  as ministrja e punëve të mbrendshme dhe as kryeprokurori nuk nxjerin në pah as edhe një dëshmi të vetme e cila do të ishte bindëse se personat e akuzuar mund të jenë dorasit e krimit", thekson DR. 

Sipas kësaj partie, refuzimi i fundit i ministres së punëve të brendshme që të respektojë kriteret e përfaqësimit nacional gjatë punësimit të 300 punonjësve të rinj në këtë ministri është treguesi më i mirë se qytetarët shqiptar janë akoma të padëshiruar dhe elemente të dyshimta në këtë shtet me shum emra dhe pa identitet të definuar mirë. 

"Dhe më në fund kërcënimi dhe dëbimi i qytetarëve shqiptar nga vendbanimet e tyre nga po ata qarqe huliganësh të cilët sponzorohen nga qeveria maqedonase – të cilëve  tani ju jepet e drejta dhe mbase edhe mbrojtja institucionale që të realizojnë në vepër atë që e shfryejnë në terenet sportive. Janë të gjitha këto disa nga ngjarjet më të fundit të cilat nuk kërkojnë shpjegim por që nxisin shqetësimin e çdo qytetari shqiptar për atë se kush rezikon më shumë  fatin ,  sigurinë dhe të ardhmen e tyre – politikat dhe sjelljet  e qeveritarëve  maqedonas ose heshtja dhe paaftësia e përfaqësuesve të tyre politik në po këtë qeveri?", ka shprehur shqetësimet DR e udhëheëqur nga Kastriot Haxhirexha. (INA)