Aleanca Kuqezi si OJQ në Maqedoni

Aleanca Kuq e Zi ka informuar përmes përfaqësuesve të saj se në Maqedoni do të funksionojë në formën e një organizate joqeveritare dhe partiake, që do të synojë bashkimin e sektorit civil shqiptar. 

“Pra, për stadin aktual ku ndodhet zhvillimi politik, social dhe ekonomik i shqiptarëve këtu, si dhe raportet gati kolonialiste të varësisë mes këtij grupi dhe shtetit të kontrolluar nga grupi tjetër etnik, ne pohojmë se ideja e themelimit dhe funksionimit të AK si parti politike nuk është e mundshme dhe as e rekomandueshme. Njoftojmë opinionin e gjerë se Lëvizja civile AK në IRJM, si organizatë civile joqeveritare, në një të ardhme të afërt klasës aktuale politike do ti paraqesë një platformë e cila nëpërmjet ndryshimeve kushtetuese do të synojë arritjen e barazisë të plotë mes shqiptarëve dhe maqedonasve si dy etni më të mëdha të në këtë vend”, theksohet në një komunikatë të AK-së. 

Sipas tyre, nëse platforma nuk do të ketë mbështetjen e faktorit politik shqiptar, Aleanca nuk do të ketë kontakte ose bashkëpunim me asnjë nga partitë politike shqiptare. 

“AK-M, denoncon publikisht presionin perfid dhe primitiv i cili ushtrohet nga segmente të caktuara shtetërore kundër aktivistëve të Aleancës në qytetin e Kërçovës dhe në Tetovë. I bëjmë thirrje publike këtyre organeve të cilat në raste edhe drejtohen nga shqipfolës të caktuar, që të heqin dorë një orë e më parë nga format e këtilla primitive të presionit ndaj bashkëkombësve dhe bashkëqytetarëve të tyre që punojnë dhe sakrifikojnë për të mirën e përbashkët të kombit”, thekson Aleanca Kuq e Zi në Maqedoni. (INA)