Partitë fushatë para kohe për zgjedhjet 2013

Partitë politike në Maqedoni kanë nisur fushatën dhe aktivitete intensive politike, disa muaj para zgjedhjeve të ardhshme lokale 2013.

Partitë politike maqedonase po zhvillojnë fushatë më dinamike përmes takimeve me qytetarët dhe konferencave me gazetarët, duke akuzuar dhe fajësuar njëra tjetrën. Partia opozitare maqedonase LSDM e mbështetur nga aleatët e saj nga fillimi i këtij muaji ka nisur karvanin e takimeve dhe mitingjeve nëpër Maqedoni, ku në çdo qytet ajo po promovon kandidatët e saj për kryetar komunash. 

VMRO-DPMNE e kryeministrit Nikolla Gruevski përmes projekteve qeveritare dhe akuzave ndaj opozitës po vazhdon një fushatë duke paralajmëruar se do të  fitojë në zgjedhjet e ardhshme lokale përballë opozitës. 

Partitë politike shqiptare janë më të heshtura në drejtim të aktiviteteve për zgjedhjet e ardhshme lokale. Derisa BDI nuk ka lëvizur me ndonjë aktivitet sa i përket fushatës për zgjedhjet e vitit të ardhshëm lokale, duke theksuar se është herët për të biseduar në këtë plan, PDSH tashmë ka paralajmëruar se nga 5 korriku do të nis me takimet me forumet partiake dhe në çdo komunë dhe vendbanim shqiptarë do të promovojë kandidatët e zgjedhur për garën në zgjedhjet lokale 2013. 

Partitë e tjera shqiptare të opozitës RDK dhe DR kanë bërë të ditur se janë duke intensifikuar aktivitetet  e brendshme partiake, përmes zgjedhjeve dhe ristrukturimeve të reja nëpër degë dhe nëndegë. 

RDK ka bërë të ditur se është në fazën finale të zgjedhjes së degëve dhe do të nis organizimin e shpejt të Kongresit të parë partiak që do të nxjerrë strukturat e para udhëheqëse të kësaj partie. 

DR gjithashtu bën të ditur se po vazhdon aktivitetet nëpër degë dhe forumet e tjera partiake, për tu konsoliduar dhe intensifikuar aktivitetet partiake. Këto dy parti kanë konfirmuar se janë në proces të konsolidimit edhe të bashkëpunimit në kuadër të aleancës së re politike ku është përfshirë edhe BDSH. Tre partitë tashmë kanë realizuar takime formale dhe pritet intensifikimi i tyre dhe aktivitete gjatë muajve të ardhshëm, duke definuar një platformë të përbashkët. (INA)