Medvegjë, shqiptarët fitojnë 16 për qind

Partia shqiptare PVD në Medvegjë si subjekt i vetëm i shqiptarëve që garoi në këtë komunë në Jug të Serbisë është radhitur e treta sa i përket rezultatit të zgjedhjeve të djeshme lokale. 

PVD lista e udhëhequr nga Florim Sahiti ka fituar rreth 16 për qind të votave, ndërsa në vend të parë shtë radhitur partia e Listës së Inicativës Qytetare të udhëhequr nga kryetari aktual i Medvegjës Sllobodan Drashkoviq, i cili ka fituar mbi 45 për qind të votave. 

Në vend të dytë është radhitur Partia Demokratike Serbe me 18 për qind të votave të fituara. 

Në këto zgjedhje kanë dalur mbi 50 për qind të votuesve, ndërsa nuk është vërejtur fluks i kënaqshëm i shqiptarëve të shpërngulur të Medvegjës, të cilët nuk kanë respektuar thirrjet për tu kthyer në vendlindje dhe për të shprehur të drejtën e votës. Shoqata “Vatra” në Kosovë ka shprehur indinjatën e thellë edhe ndaj diasporës dhe shoqatave të Medvegjës atje, të cilët nuk kanë respektuar thirrjet për kthim në vendlindje. 

Shqiptarët përmes PVD pritet të vazhdojnë marrëveshjen e koalicionit me kryetarin e deritanishëm Drashkoviq. Por, jozyrtarisht mësohet se me këtë rezultat shqiptarët arrijnë një pozicion më të kënaqshëm se sa në zgjedhjet e fundit lokale. (R.Demiri/INA)