BDI analizon punën e funksionarëve dhe kryetarëve të komunave

Këshilli i Përgjithshëm i Bashkimit Demokratik për Integrim sot ka shqyrtuar raportet e kryetarëve të komunave nga radhët e partisë së tyre. 

Anëtarët e Këshillit të Përgjithshëm vlerësuan se ndarja territoriale dhe decentralizimi përfaqësojnë një ndër shtyllat kryesore të Marrëveshjes së Ohrit dhe vlerësuan puna e bërë në mandatin aktual si dhe u analizuan projektet akoma të parealizuara të cilat kanë qenë të parapara në programet e Komunave për këtë mandat. 

Anëtarët e Këshillit të Përgjithshëm gjithashtu debatuan rreth aktualiteteve politike në vend dhe shkëmbyen opinione rreth qëndrimeve të papranueshme dhe përçarëse të liderëve të partive opozitare shqiptare. 

Në kuadër të kësaj mbledhje janë miratuar konkluza për bashkëpunimin midis pushtetit qendror dhe lokal, përmbyllja e projekteve nga ana e kryetarëve të komunave, shqyrtimi i raporteve të funksionarëve në nivel qendror dhe lokal dhe analizimi i punës së tyre dhe prioritete tjera si dhe zhvillimi i barabartë i rajoneve dhe realizimi i marrëveshjeve politike në nivel të koalicionit qeverisës. 

BDI nëpërmjet komunikatës sërish ka theksuar se shpreh keqardhje të thellë për përsëritjen e qëndrimeve përçarëse dhe lokaliste të liderit të PDSH-së, Menduh Thaçi, dhe dënon çdo përpjekje të tij për ndasi dhe diferencim midis shqiptarëve. (INA)