Vjenë, ndalohet rrjeti i trafikantëve të drogës

Policia austriake sot ka arrestuar një grup trafikantësh të drogës, udhëheqësi i së cilës është një shtetas i Maqedonisë.

Në një njoftim të policisë austriake theksohet se është zbuluar grupi i trafikantëve të drogës, i cili operonte me biznesin e tyre në Vjenë dhe qytete tjera. Gjatë këtij operacioni janë bashkërenduar aktivitetet edhe me njësinë për luftën kundër krimit të organizuar nga Maqedonia. 

Grupi nëntë anëtarësh i trafikantëve operonte në Vjenë dhe se gjatë periudhës nga viti i kaluar kishte arritur që të shiste sasi të konsiderueshme të drogës, marijuanë, kokainë dhe heroinë në Vjenë dhe qytete tjera. 

Gjatë operacioni janë bastisur dhe kontrolluar disa objekte në Vjenë, me ç`rast është konfiskuar sasi droge dhe para. 

Sipas policisë austriake, i dyshuari kryesor si udhëheqës i grupit të trafikantëve është një shtetas i Maqedonisë me inicialet B.J, 31 vjeç. Ai më parë ka pasur ndalesë për hyrje dhe qëndrim në Austri për shkak të trafikimit të lëndëve narkotike. (INA)