Bejta: Një milion euro kredi për Gostivarin

Ministri i Vetëqeverisjes Lokale Nevzat Bejta mbajti një pres konferencë me gazetarët, me ç’rast njoftoi se me angazhimin e Qeverisë së Republikës së Maqedonisë, Ministrisë së Financave dhe me angazhimin e tij personal si ministër,  komunës së Gostivarit i është ndarë kredi nga Banka Botërore në vlerë prej 1 milion euro. Këto mjete, komuna e Gostivarit do të mund ti harxhoj për ndriçim publik më ekonomik, për mirëmbajtjen e higjienës së qytetit dhe për rezervuarin  e ujësjellësit në fshatit Debresh.

Ministri Nevzat Bejta potencoi gatishmërinë e tij të kahershme duke ritheksuar edhe njëherë se gjatë mandatit të tij si ministër, dëshiron të bashkëpunoj me të gjitha komunat pa dallim të proveniencave politike të kryetarëve të tyre, për të mirën e të gjithë qytetarëve dhe për përmirësimin e jetës së tyre nëpër komuna.  

“Me angazhimin e Qeverisë së RM-së, Ministrinë e Financave dhe me angazhimin tim personal, nga Banka botërore është siguruar kredi për komunën e Gostivarit në shumë prej 1 milion euro. Gjysma e këtyre mjeteve është paraparë të shfrytëzohen për rikonstruimin e ndriçimit rrugor ekzistues të qytetit dhe 19-të vendbanimeve përreth. Do të zëvendësohen 5.217 poça të vjetër elektrik të cilët do të ndërrohen me të ri të cilët janë shumë më ekonomik dhe më cilësor, me çka do të ulet kostoja e harxhimit të energjisë elektrike për ndriçim publik që paguan komuna si dhe investime tjera në këtë drejtim. Poashtu, rreth 400 mijë euro nga kjo kredi janë parapa të investohen për qytet më të pastër, më saktë për sigurimin e makinave bashkëkohore për larjen e rrugëve, për pastrimin e linjave të kanalizimit atmosferik dhe ujërave të zeza si dhe për automjete për pastrimin e borës në kushte dimërore dhe shenjëzimin e rrugëve. Me rëndësi të veçantë është të theksohet se rreth 100 mijë euro nga kjo kredi janë parapa të ndahen për ndërtimin e rezervuarit të ujit për ujë të mjaftueshëm dhe të pastër për pije për banorët e fshatit Debresh të Gostivarit. Me këtë pritet të zgjidhet problemi shumëvjeçar me mungesën e ujit për pije dhe nevoja tjera për Debreshasit e njëherësh do të zvogëloheshin në maksimum humbjet e panevojshme të ujit” theksoi ministri Bejta në pres konferencën e sotme me gazetarë.

Me këto mjete, më saktë nga kjo kredi e Bankës Botërore, komuna e Gostivarit do të mund të ndërmarrë aktivitetet e lartpërmendura që edhe njëherë dëshmohet  publikisht angazhimi i Qeverisë dhe veçanërisht angazhimi i ministrit të vetëqeverisjes lokale Nevzat Bejta për krijimin e kushteve sa më të mira për qytetarët e Gostivarit, siç është edhe stacioni filtrues i ujit në fshatin Vërtok, i cili duhet të jetë gati në vitin 2013-të. (INA)