700 kandidatë kanë kaluar testet për policë

Ministria e Punëve të Brendshme (MPB) në Maqedoni informoi sot se 700 kandidatë kanë kaluar testet për gatishmërinë fizike dhe aftësitë motorike, në kuadër të konkursit për pranimin e 300 policëve të rinj.

”Deri në fund të kësaj faze mbeten edhe disa ditë. Deri më tani selektimin  e kaluan 596 meshkuj dhe 104 femra, përkatësisht 10 deri 15 për qind, që është një numër stabil i kandidatëve të cilët do t'i kalojnë kontrollet", deklaroi ministrja e MPB-së, Gordana Jankullovska, e cila vizitoi sot kazermën Gjorçe Petrov, ku po bëhen testimet e kandidatëve.

Ajo theksoi se në mesin e kandidatëve ka pjesëtarë të të gjitha bashkësive etnike, në përqindje me pjesëmarrjen e tyre në popullatën e përgjithshme në Maqedoni.

Kontrolli i kandidatëve zhvillohet në disa faza. pas kësaj të parës, në të cilën testohet gatishmëria fizike dhe aftësitë motorike, pasojnë testet psikologjike, kontrolli i gjendjes shëndetësore, kontrolli i njohurive të përgjithshme, të shprehurit me shkrim dhe në fund intervista e cila është edhe faza përfundimtare gjatë selektimit të kandidatëve.

Ditë më parë një pjesë e kandidatëve shqiptar deklaruan për INA se ishin skualifikuar padrejtësisht nga testet fizike, ndërsa nga ana tjetër ishin kaluar pozitivisht kandidatët maqedonas që ishin në grupin e tyre. (INA)