Demir Lena nderohet me Urdhrin “Nderi i Kombit”

Presidenti i Shqipërisë, prof.Dr.Bamir Topi, gjatë një ceremonie zyrtare, do të shpallë vendimin për të nderuar Demir Lenën, me Urdhrin “Nderi i Kombit” me motivacionin për kontributin e tij të çmuar për pavarësinë e Shqipërisë, me rastin e shënimit të 100 vjetorit të Pavarësisë.

Pos Demir Lenës, presidenti i Shqipërisë, prof.Dr.Bamir Topi, do të nderojë me çmimin “Luftëtar shqiponjë”, Riza Ajron, komandant i “Taborit të Strugës”, ndërsa “Taborrin e Strugës” do ta nderojë me çmim të veçantë për kontributin e dhënë për rezistencën e organizuar kundër pushtuesve dhe për pavarësinë e Shqipërisë.

Sipas shënimeve të kohës, hulumtimeve të bëra dhe njohurive historike, janë këto figura të merituara të historisë shqiptare; Riza Ajro komandant i “Taborit të Strugës” formacion i organizuar i rezistencës luftarake kundër pushtuesve serb, ndërsa Demir Lena, zëvendëskomandant i këtij formacioni, të cilët janë vënë në ndjekje të regjimenteve serbe, duke çliruar Strugën dhe Ohrin në periudhën para Luftës së Parë Botërore. Ceremonia e ndarjes së çmimeve do të zhvillohet në ambientet e Presidencës së Shqipërisë në Tiranë, më 20 korrik, 2012. (INA)