Publikohen emrat e 11 ish-spiunëve në Maqedoni

Komisioni për Lustrimin në Maqedoni ka publikuar në faqen zyrtare emrat dhe dosjet e personave që kanë qenë bashkëpunëtorë të shërbimeve sekrete.

Në mbrëmje u publikuan emrat dhe dosjet e 11 personave që kanë qenë ish-spiunë dhe se në mesin e tyre janë edhe katër ish-funksionarë dhe personalitete publike shqiptare.

Personat e shpallur si bashkëpunëtor të shërbimeve sekrete në të kaluarën janë: Sllobodan Ugrinovski, Zoran Jovanovski (anëtar i këshillit komunal në Rosoman), Vlladimir Millçin (regjisor dhe kryetar i Institutit Shoqëri e Hapur – Soros), Faredin Miftari ( Drejtor i burgut), Sejfedin Haruni (ish-deputet dhe kryetar i PPD-së), Jordanço ]evrevski (dekan i Fakultetit të Arteve dramatike), Nikolçe Babovski (kandidat për deputet), Vangel Gagaçev (ish-gjykatës), Kosta Ballabanov, Shaban Shehu dhe Mahi Nesimi.

Në faqen e Komisionit të Lustrimit janë shpallur vendimet që konfirmojnë këto persona si bashkëpunëtor të shërbimeve sekrete në të kaluarën, kryesisht bashkëpunëtor të UDB-së jugosllave, por gjithashtu janë shpallur edhe dokumente dhe dosje plotësuese.

Komisioni për Lustrimin në të ardhmen në bazë të Ligjit të ri gradualisht do të publikojë emrat e bashkëpunëtorëve të shërbimeve sekrete në Maqedoni. (INA)

13:42 - Vizita e një delegacioni nga ambasada amerikane në Shkup ka shtyer sot publikimin e paralajmëruar të emrave të spiunëve në Maqedoni.
Komisioni për Lustrimin për sot kishte paralajmëruar publikimin e emrave dhe dosjeve të 11 personave që kanë qenë bashkëpunëtorëve të shërbimeve sekrete në të kaluarën, kryesisht bashkëpunëtor të ish-UDB-së. 

Por, një delegacion i ambasadës amerikane sot ka qëndruar për vizitë të këtij komisioni, ku zyrtarisht u bë e ditur se delegacioni amerikan ka shprehur interes lidhur me procesin e lustrimit dhe Ligjin e ri, me të cilin publikohen emrat dhe dosjet e ish-spiunëve. 

Kryetari i Komisionit të Lustrimit, Tome Axhiev hodhi poshtë sot pohimet se kjo vizitë ndikoi në shtyerjen e publikimit të emrave dhe dosjeve të 11 funksionarëve të kaluar, që kanë bashkëpunuar me shërbimet sekrete. (INA)

08:16 - Komisioni për lustrimin në Maqedoni sot pritet të shpallë publikisht dosjet e 11 personave që kanë qenë spiunë në të kaluarën. Komisioni në fillim të kësaj jave paralajmëroi se deri të premten do të shpallen emrat e bashkëpunëtorëve të shërbimeve të kaluara sekrete, kryesisht UDB-së, të cilët janë konfirmuar në bazë të dosjeve të gjetura dhe të verifikuara.

Shpallja publike e gjithë ish-spiunëve do të bëhet në bazë të ligjit për lustrimin, ndërsa brenda anëtarëve të Komisionit për lustrimin ka mospajtime lidhur me këtë masë. Një pjesë e anëtarëve të komisionit, por edhe sektori joqeveritar ka theksuar se me publikimin e emrave të spiunëve do të shkelen të drejtat e privatësisë të personave të tretë që nuk janë të përfshirë në këtë proces. Në mesin e personave të parë të shpallur si spiunë pritet të jenë edhe tre shqiptarë.  (INA)