Fillon ndërtimi i stacionit filtrues për ujësjellësin në Vrapçishtë

Në komunën e Vrapçishtit të Gostivarit sot në mënyrë solemne u shënua fillimi i ndërtimit të stacionit filtrues për sistemin e ujësjellësit në këtë komunë.

Në këtë ngjarje kanë marrë pjesë ministri i mjedisit dhe planifikimit hapësinor, Abdilaqim Ademi, zëvendës-kryeministri Musa Xhaferi dhe kryetari i komunës së Vrapçishtit, Bajram Kadrija.

Ministri Ademi theksoi se ky projekt do të përkrahet nga Ministria e Mjedisit dhe Planifikimit Hapësinor dhe Qeveria e Maqedonisë me gjysmën e mjeteve financiare, me ç`rast vetëm dikasteri i tij ka ndarë 6 milion denarë.

“Në këtë mënyrë, mendoj se përveç se do të sigurojmë ujë të pijshëm cilësor dhe të pastër, do të ndikojmë edhe në mbrojtjen e shëndetit të banorëve të fshatrave Zubovcë, Galatë dhe Vrapçisht të cilët do të ndjejnë dobitë e këtij projekti”, theksoi ministri Ademi.

Ndërtimi i stacionit filtrues do të kushtojë rreth 17 milionë denarë. Në të do të instalohen filtra automatik të dyfishtë dhe kapaciteti do të jetë 30 litra në sekondë. Në këtë investim do të kontribuojë edhe komuna e Vrapçishtit, dhe sipas deklaratës së kryetarit të komunës Kadriu, realizimi i projektit duhet të përfundojë në vitin 2013. Nga ujësjellësi i Vrapçishtit me ujë furnizohen rreth shtatë mijë banorë. (INA)