Sot protesta kundër shtrenjtimeve

Nisma qytetare “Aman” sot do të mbajë protesta kundër shtrenjtimeve të energjisë elektrike, derivateve të naftës dhe ngrohjes në Maqedoni.

Protestat e reja janë paralajmëruar për sot në Tetovë, Kumanovë dhe Prilep. Ato nisën javën e kaluar në Shkup, përmes një tubimi masiv të qytetarëve, ku u shprehë revolta e qytetarëve kundër çmimeve të larta të energjisë elektrike, ngrohjes dhe derivateve të naftës. 

Nisma qytetare “Aman” i ka bërë thirrje qytetarëve që të përkrahin masivisht këto protesta. 

Qytetarët kërkojnë urgjentisht kthimin e tarifave të energjisë së lirë, korrigjimin e çmimeve të energjisë dhe ngrohjes të njëjtë sikur në vitin 2008 si dhe uljen e çmimeve të derivateve të naftës, duke i vënë një kufi caktues, në përputhje me standardin jetësor dhe të ardhurat e qytetarëve. “Aman” paralajmëroi se protesta do të mbahen edhe nëpër qytete të tjera dhe ato pritet të jenë masive dhe të kenë përkrahjen e qytetarëve.  (INA)