Ministria e Arsimit ultimatum për heqjen e tabelave në shkollat e Çairit

Inspektorati Shtetëror i Arsimit (ISHA), njoftoi të martën se 16 shtatori është afati i fundit që të kthehen emrat e vjetër në katër shkollat e Çairit, në pajtim me statutin e shkollave.

Në njoftim thuhet se, ISHA pas afatit të përcaktuar do të  kontrolloj dhe inspektojë edhe një herë shkollat e lartpërmendura dhe do të marr masa në përputhje me ligjet në fuqi.

Drejtoresha  e inspektoratit, Nadica Nikolloska ka deklaruar se, nëse nuk veprohet sipas vendimit të Inspektoratit shtetëror të arsimit do të parashtrohen kallëzime për kundërvajtje deri te gjyqet themelore.

Dënimet janë dy mijë euro për subjektin juridik, ndërsa prej 500 deri 800 euro për personat përgjegjës në subjektin juridik.

Me vendosjen e tabelave me emrat e rinj nga ana e Komunës së Çairit, nga e hëna, respektivisht kur edhe fillon viti i ri shkollor 2012-2013, Shkolla Fillore "Cvetan Dimov" do të quhet "Hasan Prishtina", "Rajko Zhinzifov" - “Ismail Qemali”, shkolla fillore "Jane Sandanski" - "Jashar Beu" dhe "Nikolla Vapcarov" do të quhet "Imri Elezi".

Komuna e Çairit ka  paraqitur një kërkesë në Ministrinë e Arsimit për riemërtimin e shkollave, por ministria nuk ka dhënë përligjin për ndryshimin e emrave dhe vendosjen e tabelave me emra të rinj.  (INA)