Takimi Ahmeti – Gruevski për krizën qeveritare

Kryeministri dhe lideri i VMRO-DPMNE, Nikolla Gruevski dhe kryetari i BDI-së, Ali Ahmeti pritet të takohen lidhur me krizën qeveritare dhe zërat për zgjedhje të parakohshme.

Një zyrtar i lartë i Qeverisë i tha sot agjencisë së lajmeve INA  se takimi Ahmeti dhe Gruevski do të zhvillohet sonte apo nesër, ku në agjendë do të jetë kriza qeveritare dhe tensionet midis dy partive që kulmuan me Projekt – Ligjin për përkujdesje institucionale për ish-pjesëtarët e forcave maqedonase të sigurisë të ashtuquajtur “branitellat” e 2001. 

“Sipas informacioneve që kemi me ndërhyrjen e ndërkombëtarëve do të realizohet takimi midis Ahmetit dhe Gruevskit dhe pritet definimi apo përkeqësimi i raporteve  të bashkëqeverisjes”, theksoi për agjencinë e lajmeve INA, një zyrtar i Qeverisë. 

Liderët e dy partive në pushtet janë takuar dy javë më parë kur shpërtheu kriza qeveritare, pas homazheve në varrezat e UÇK-së nga ministri i mbrojtjes, Fatmir Besimi dhe pjesëtarë të ARM-së, një akt që shkaktoi revoltën dhe reagimin e VMRO-DPMNE, e cila menjëherë reagoi me projekt –ligjin për “branitellat”, duke shmangur zgjidhjen e statusit për UÇK-në. (INA)