PDSH: Buxheti 2013 diskriminues për shqiptarët

Partia Demokratike Shqiptare (PDSH) e ka quajtur edhe një buxhet diskriminues për shqiptarët buxhetin e vitit 2013 të Qeverisë së Maqedonisë.

“Sot ju prezantoj 15 mijë fletë të buxheteve prej kur është ky koalicion i VMRO-së me BDI-në në qeveri. Këtu para meje i kam buxhetet dhe rebalanset e buxheteve duke filluar prej vitit 2008,2009,2010,2011,2012 dhe propozimi i buxhetit për vitin2013. Miliarda euro para të shqiptarëve të harxhuara për projekte maqedonase. Në këto buxhete shohim mashtrimin që ju bëhet shqiptarëve, për 5 vite përsëriten të njëjtat propozim projekte që nuk po gjejnë dot realizimin e tyre. Si psh: Përmendet Korridori 8 a në anën tjetër për Korridorin 10 Gruevski promovoi projektin në vlerë prej 250 milion euro, kurse për korridorin 8 thuhet që ende kompletohen projektet dhe dokumentacionet ashtu siç po kompletohen projektet dhe dokumentacionet për Linjën hekurudhore Kërçovë-Strugë, a në anën tjetër në linjën hekurudhore Maqedoni-Bullgari investohen 100 milion euro! Zona e lire ekonomike në Tetovë edhe pas 5 viteve shqiptarët vazhdojnë të shohin vetëm therra e kaçuba, përderisa investimet e huaja të gjitha pa asnjë përjashtim i shohim nëpër vendbanimet maqedonase, edhe pse 9 vite  resorin përgjegjës për investimet, resorin e ekonomisë e udhëheq kuadër i BDI-së”, theksoi deputeti i PDSH-së, Bekim Fazliu.

Sipas tij, për projektin e vendkalimit kufitar Llojan-Miratoc, iku edhe viti 2012, çdo ti thoshte vallë tani plaku i Llojanit Ali Ahmetit!

“Çdo fletë në këto buxhete paraqet diskriminim të shqiptarëve. Këto fletë të buxhetit dhe këto para në këto buxhete janë mundi dhe djersa e shqiptarëve, është ndarja nga kafshata e gojës për ta mbushur këtë buxhet. BDI dhe Ali Ahmeti do të vazhdojnë të tallen me shqiptarët edhe në vitin 2013. Me Monstra e Branitella, me Buste kafshësh dhe heronj të kontestuar, me tekste shkollore ofenduese e me nxënës shqiptarë të përjashtuar nga procesi arsimor, aksione policore, vrasje e arrestime e krejt kjo është si pasojë e fenomenit të çmendurisë  Ali Ahmeti i cili i adresohet ajrit dhe as që e dëgjon piskamën e popullit te vet, varfërimin dhe shkatërrimin ekonomik të tyre”, theksoi deputeti Fazliu.(INA)