Labënishti: Sela shpif, më 2009 PDSH ndihmonte Canovskin

Dr.Arben Labënishti i shoqëruar nga anëtarë të Shtabit Zgjedhor Komunal realizoi takime me qytetarët në fshatrat Bixhovë dhe Novo Selë dhe dy tubime në fshatrat Livadhi dhe Koroshishtë.

Shefi i Shtabit Zgjedhor Komunal Ramiz Merko ka diskutuar në këto takime duke potencuar se Struga është shqiptare dhe e tillë do të jetë në jetë të jetëve. Ai apeloi që në këtë situatë të krijuar shqiptarët duhet të bashkohen rreth BDI-së, partisë më të madhe shqiptare dhe më 24 mars të votojnë Labënishtin.

Kandidati Labënishti numëroi një sërë projektesh të sferave të ndryshme duke filluar me sanimin dhe asfaltimin e rrugëve, investime në rrjetin e ujësjellësit, sistemin e ujërave të zeza, politikat që kanë të bëjnë me mbështetjen e rinisë, arsimit dhe kulturës. Jam i interesuar tha ai që Struga të frymojë si një qytet i zhvilluar evropian. Në takimin e Livadhisë, Labënishti ju drejtua kandidatit të PDSH-së Ziadin Sela për të cilin tha se ai po shërbehet me mashtrime, shpifje dhe spekulime  në adresë të tij.

"Këto prononcime dhe ky koncept politik mua nuk më shqetësojnë ngase unë do të merrem me prioritet e qytetarëve dhe me realizimin e projekteve të programuara – tha Dr.Arbeni.

Ai tha se është transparent, nuk fyen,  dhe ka në dispozicion argumente për të vërtetën.

"Në portalet informative të Strugës dhe në një debat që pata sot me kundër kandidatin Sela, u tha se ne paskemi kopjuar programin e tij. Zotërinj, ky është program i BDI me 23 faqe i shtypur në shtypshkronjë ndërsa, kjo është një fletushkë e kundër kandidatit, vlerësoni ju vetë të nderuar. Unë, u përballa me  spekulime dhe të pavërteta  në lidhje me koalicionin me PAE. Më 2009 zoti Canoski, dhe partia e tij nuk ishte me ne, por koketonte me PDSH, por ne e luftuam politikisht dhe  e fituam me ndihmën tuaj, ndërsa sot kur Canoski ka gjetur rrugën e tij ka ardhur te partia më e madhe shqiptare BDI, bujrum mirëse ka ardhur bashkërishtë do fitojmë Strugën. Kundër kandidati im gjithashtu tha se zoti Canoski u kujdesuaka për torbeshizmin, por para pak muajsh kryetari i PDSH zoti Thaçi tha se llabunishtarët, oktisarët dhe podgorcarët janë torbesh ku është sinqeriteti këtu. Foli, edhe për disa çështje të tjera për pompa benzini të cilat nuk e di se nga i ka gjetur, por megjithatë këto janë shpifjet e tyre, ky është koncepti politik i tyre dhe unë nuk dua të merrem më shumë me ta, sepse dua të merrem me programin tonë. Dua të merrem me ju, sepse për këtë arsye e ka dorëzuar mandatin e deputetit që tu përkushtohem juve dhe Strugës tonë. Programi i BDI-së për periudhën 2013-2017 është një program i mirë studiuar", theksoi Labënishti. (INA)