Thaçi: Votat pro BDI dhe Rufi Osmanit janë pro Gruevskit

Partia Demokratike Shqiptare realizoi takime informative me qytetarët e rrethinës së Gostivarit dhe së fundmi mbajti tubim qendror përpara në Çegran. 

Kryetari i Partisë Demokratike Shqiptare Menduh Thaçi theksoi se në këtë fushatë dhe në këto zgjedhje, PDSH po demostron se është ndryshe prej të tjerëve. 

"Ne jemi para një vendimi shumë të rëndësishëm historik, Vashingtoni dhe Brukseli  në mbrëmjen e 24 Marsit do ti numërojnë votat që janë kundër Qeverisë së Gruevskit, që duhet të jenë të PDSH-së dhe votat që janë pro Qeverisë së Gruevskit. Votat që janë pro Qeverisë së Gruevskit janë votat e BDI-së dhe Nevzat Bejtës që janë të lumtur me Gruevskin, por në këto zgjedhje na ndodhi edhe një fatkeqësi edhe votat që mund të jepen për Rufi Osmanin njësoj janë pro Gruevskit se është Qenan Hasipi partneri i koalicionit i cili e verifikon politikën e Gruevskit. Ju lus që ky ndëshkim të jetë edhe më i madh edhe për një arsye shumë të thjeshtë, gostivaras dhe tetovarë, ky zullum i madh që  po ndodh me shqiptarët e Shkupit është një film i vjetër i sllavëve, një film i vjetër i ish Jugosllavisë dhe Serbisë, të gjithë ne që jemi në moshë pak më të shtyrë  e dimë si punonte dhe e kemi ndjerë në shpinat tona si ka punu Jugosllavia dhe Serbia, çdo politikë antishqiptare si eksperiment fillimisht e bëjshin te shqiptarët e Maqedonisë duke i llogarit numër më të vogël dhe më të dobët, nëse ky eksperiment i politikës antishqiptare jepte rezultat menjëherë vazhdonte zbatimin edhe në Kosovë", theksoi Thaçi. 

Sipas tij, nëse eksperimenti antishqiptar i Qeverisë së Shkupit  që bëhet të shqiptarët e Shkupit, nuk ndalet me datën e 24, situata e njejtë do të vijë në Gostivar e Tetovë. 

Kandidati për kryetar Miat Sadiku theksoi se në këtë rajon gjithandej vërehet mungesë e infrastrukturës elementare, mjerimi që projekti i përjetshëm i kryetarëve të Komunës së Gostivarit e kanë mbjell për vite me radhë. 

"Paratë publike të buxhetit të komunës janë paratë tona dhe ne nuk e kemi luksin për një punë të paguajmë dy herë, një asfallt që është shtruar dje të e gropojmë nesër për të instaluar kanalizimin apo ujësjellësin. JEMI NE, është Partia Demokratike Shqiptare dhe platforma politike e saj që ofron zgjidhje për problemet e tona të shumta”, theksoi Sadiku. (INA)