Ahmeti: Gostivari ka stagnuar, me Bejtën do ecin punët

Tubimin e radhës parazgjedhor, Dega e Bashkimi Demokratik për Integrim, e mbajti në Vrapçishtë dhe Debresh të Gostivarit. I pranishëm në tubim ishte edhe vetë lideri i BDI-së Ali Ahmeti, kandidati për kryetar komune, Nevzat Bejta, Ministri i Mbrojtjes, Talat Xhaferi, koordinatori i grupit parlamentar të BDI-së, Nexhat Jakupi, bartësi i listës së këshilltarëve, Nasir Musliu dhe kandidati për këshilltar nga Debreshi, Muhamed Useini.  

Shefi i shtabit komunal zgjedhor, Adnan Jashari para bashkëfshatarëve të tij në Debresh, tha se ky fshat ka nevojë për realizimin edhe të disa projekteve me rëndësi, por ai theksoi se në këtë fshat, në kohën kur kryetar i Gostivarit ishte Nevzat Bejta janë realizuar shumë projekte të rëndësishme,  si ujësjellësi, hapja dhe rregullimi i disa rrugëve, rregullimi i shkollës, ambulantes dhe projekte tjera.  

Lideri i BDI-së, Ali Ahmeti, tha se Nevzat Bejta, energjitë e veta do i vendosë në dispozicion të përparimit të komunës. 

“Pse duhet të votohet Nevzati 'zullumqari'. Po, Nevzat Bejta është 'zullumqar' sepse prishi shtëpi ku janë pushkatuar shqiptar dhe preu plepa që mund të rrezoheshin e të vrisnin fëmijë dhe ato hapësira i ka mbjellë me lule. Nuk e them unë, por është  i vetmi person që ka vepruar me guxim. Njerëzit përsëri vlerësojnë punën, e kemi vlerësuar dhe ne, prandaj përsëri u përcaktuam për Nevzatin. Është punë e lodhshme të drejtosh Komunën e Gostivarit dhe të japish dorëheqje nga posti ministër, që është një post me shumë komoditet sepse nuk i ka vështirësitë e Gostivarit për ujë, rrugë... Nevzati jo s’kthehet ministër. Rufi Osmani të kishte bërë punë të mira, ta kishte vazhduar punën e Nevzatit, ne në BDI do pajtoheshim, mirëpo ka stagnim dhe nuk ka potencial. Unë ju siguroj juve se Nevzat Bejta, energjitë e veta do i vendosë në dispozicion të përparimit të komunës. Me Nevzatin komuna do ecë përpara. Mbas Nevzatit fuqishëm do qëndrojmë të gjithë, i gjithë Bashkimi Demokratik për Integrim, sepse ne duam komuna të mira”, tha Ahmeti.

Kandidati për kryetar komune, Nevzat Bejta tha se për fshatin Debresh do të ndërtohet sallë sportive, kanalizim për ujëra të zeza dhe plan urbanistik.     

“Pse ai në Debresh nuk bëri madje një metër kanalizim për ujëra të zeza? Kanalizimin ne do ta bëjmë në Debresh, sepse ky projekt është i paraparë në programin tonë zgjedhor. Ne e bëmë projektin, dhamë leje dhe e sollëm ujin në Debresh. Ne nuk patëm kohë për ta ndërtuar edhe kaptazhin, por siguruam 50 mijë euro nga qeveria për vazhdimin e ndërtimit të ujësjellësit në Debresh. Asnjë punë nuk e kemi bërë me koofinancim sepse qytetarët paguajnë tatim, por, nuk e di nga e nxori ai këtë gjë. Mërgimtarëve nuk duhet tu merren para që të realizojnë projekte të komunës ose qeverisë, ata parat e grumbulluara duhet ti shfrytëzojnë për nevoja tjera. Sallën sportive që ne e kemi nisur në Debresh, ka mbetur ashtu siç e kemi lënë para katër viteve. Ju garantoj se ne do ta ndërtojmë sallën këtu në fshatin tuaj. Debreshi ka nevojë për miratimin e planit urbanistik dhe ne do ta bëjmë këtë në mandatin tonë”, tha Bejta, kandidat i BDI-së për kryetar të Gostivarit.  

Bartësi i listës për këshilltar, Nasir Musliu tha se në këto zgjedhje dalim me oferta konkrete, të zhvillojmë komunën tonë, të avancojmë  rinin tone.

“Na   ofrojmë   program të qartë për te mirën e çdo qytetari dhe ju  sigurojmë se projektet tona,  investimet tona do te prekin çdo sfere të jetës: në arsim, në shëndetësi, urbanizëm, ne ekonomi, në kulturë  dhe  ato do të reflektojnë ne çdo vendbanim te komunës sonë”, tha Musliu.  

Debreshi ka kërkesat e veta dhe ato i kemi shtruar në Programin tonë zgjedhorë, tha kandidati për këshilltar, Muhamed Useini. “U premtojmë së i tërë potenciali ynë do të vendoset në shërbimin tuaj. Ne do të punojmë për  përmirsimin e infrastrukturës së fshatit Debresh, definitivisht do të përfundojmë punët ndërtimore në sallën e sportit, do të përmirsojmë ndricimin publik, ndërsa do të regullojmë edhe shtratin e zallit (jazit) që kalon përmes fshatit i cili do të bëhet segment i bukur i fshatit e jo segment i shëmtuar që shkakton edhe dëme”, tha Useini. 

Para banorëve të Debreshit folën edhe ministri i mbrojtjes, Talat Xhaferi dhe koordinatori i Grupit parlamentar të BDI-së Nexhati Jakupi. (INA)