Nisin konsultat për formimin e komisionit për ngjarjet e 24 dhjetorit

Me nismën e presidencës kanë nisur konsultimet për formimin e komisionit për zbardhjen e ngjarjes së 24 dhjetorit të vitit të kaluar në Parlamentin e Maqedonisë, kur shpërtheu incidenti midis pozitës dhe opozitës për projekt- buxhetin si dhe nxjerrja e deputetëve të opozitës nga ana e shërbimeve të sigurimit, për shkak të bllokimit të procedurës për votimin e buxhetit 2013. 

Boris Josifovski, sekretari i përgjithshëm i kabinetit të presidentit Gjorgje Ivanov do të zhvillojë sot takime konsultuese me sekretarin e përgjithshëm të VMRO-DPMNE, Kiril Bozhinovski si dhe ate të LSDM-së, Andrej Petrov. Një ndër propozimet është që të formohet një komision ekspertësh që do të vërtetojë faktet dhe ngjarjet e 24 dhjetorit. Takimi i parë në këtë format veçmë u zhvillua mbrëmë me ftesë të sekretarit të presidencës. Në këtë takim është biseduar për aktivitetet e deritanishme lidhur me formimin e komisionit. 

Formimi i këtij komisioni është pjesë e marrëveshjes së arritur midis dy partive më të mëdha maqedonase me ndërmjetësimin e evrokomisionerit për zgjerim, Shtefan Fyle. Opozita maqedonas pas 24 dhjetorit të vitit të kaluar vendosi bojkotin e Parlamentit dhe më pas të zgjedhjeve lokale të 24 marsit, duke e akuzuar maxhorancën për suspendim të demokracisë  dhe dhunë ndaj të zgjedhurëve të popullit dhe gazetarëve, të cilët u nxorrën nga salla e Parlamentit, që më pas maxhoranca votoi buxhetin për vitin 2013. (INA)