Ligjeratë për “hoxhën” Lam-llam - Arben Zeqiri

Bëj nijet të shkruaj për atë që na ka urdhëruar Zoti, për rrugën që na shtroi Ai (islamin), për robërit që Zoti na i dërgoi për të na drejtuar, si Arbën Xhaferi, ndërsa lus t’mi falë mëkatet që po përmend emrin e mikut të Iblisit

Kisha dëgjuar se hoxhallarët kanë qenë në fokusin e shërbimeve antishqiptare, duke filluar nga KGB-ja ruse, UDB-ja jugosllave e deri te shërbimet e sotme, por s’kisha besuar. Më thanë se nuk kishin arritur t’i bindin të gjithë, por një numër të vogël të hoxhallarëve që të mbajnë ligjërata antikombëtare dhe kur ata kishin dështuar në misionin e tyre, ose dekonspiroheshin, atyre shërbimet ju jepnin dokumente dhe i nxirrnin jashtë vendit për dy arsye: o t’i rehabilitojnë dhe t’i kthejnë përsëri, o tua lëshojnë pas mërgimtarëve.

Dhe në këtë po bindem sa herë që po lexoj shkrimet e disa të pashpirtëve. Po, të pashpirt duhet të jenë njerëzit që punojnë për ato shërbime dhe gjithashtu të pashpirt duhet të jenë njerëzit që luten për vdekjen e një robi të Zotit në çastet kur ai lufton për jetë. Edhe më i pashpirt duhet të jetë ai që tenton të ofendojë, nënçmojë dhe njollos jetën e një njeriu qoftë ai vetëm një qytetarë i thjeshtë apo edhe figurë publike (para Zotit dhe para vdekjes jemi të barabartë dhe vetëm Zoti na vlerëson), kur është në gjendje të rëndë shëndetësore dhe lufton për jetë.

Ndoshta dikush do të më pyes si atë holandezin e islamizuar se a kam frikë se mund të ndiqem ose edhe “rrezikohem” që po shkruaj kështu, por edhe unë do të përgjigjem njëjtë si ai besimtarë: demaskimi i albanofobëve në traditën time fetare dhe kombëtare është i lejuar, ndërsa në gjashtë atdhetë e mi (Shqipëri, Kosovë, Maqedoni, Preshevë, Malësi të Madhe dhe Çamëri), atij albanofobit që po vjell zehër mbi intelektualët dhe patriotët shqiptarë i është ndaluar çdo lloj veprimtarie.

Thotë “mendoj islamikisht”, por harron se në kulturën islame “istat” dhe “kishtat” nuk bëjnë pjesë, përkundrazi janë pjellë e shërbimeve anti islame dhe anti shqiptare si “islamist”, “irredentist”, “terrorist”…etj. Në fakt, nuk jam i sigurt nëse ka harruar apo e ka nga përvoja e deritanishme me ato shërbime. Po përmend kuaziborgjezët, një ëndrër që kurrë nuk ju realizua. Pa e pyetur tregon vetë se jeton butë dhe rehat në Londër, ndërsa shitet patriot se në atdhe ka hëngër mëngjes, drekë dhe darkë me bukë e kos. Edhe unë dhe shumë të tjerë si ky “hoxhë” me bateri vazhdojmë të hamë bukë e kos, por asgjë s’po na detyron të braktisim atdheun dhe të jetojmë butë e rehat nëpër metropolet e Evropës.

Edhe për ne Atdheu ka siguruar një copë bukë, madje për disa që janë angazhuar pak më shumë edhe se unë, Atdheu ka siguruar edhe diç më tepër. Ka punuar, shkruar dhe nuk qenka ndalur duke i bërë këta dy punë “në emër të atdheut” dhe kur nuk ka pranuar të nënshtrohet para njerëzve që kanë qenë lajkatarë të mësimeve hyjnore. Nuk është nënshkruar, por që në moshë të re shpejtë qenka lodhur dhe ka braktisur edhe Atdheun edhe “hoxhllëkun”, sepse është lodhur nga buka e kosi dhe nga shkrimet që sot e kësaj dite nuk e dimë kush ia porositi apo fundja edhe kush ia shkroi.

Merr guximin të shkruajë për tre emra që i quan VIP dhe i lutet zotit që në këto ditë të Ramazanit të mos mallkohet nga njerëzit e racës së tij. I garantoj këtij njeriu që nga njerëzit e racës së tij nuk do të mallkohet, sepse kurrë s’të mallkojnë ata të cilëve ju shërben, por nëse i shkon mendja të shqiptarët dhe besimtarët le ta dijë se mallkimin e ka të sigurt. Nuk po ia përmend emrin, sepse pikërisht në muajin e Ramazanit thuhet që Iblisi dhe shinët e pa fe rrinë lidhur dhe është e ndaluar t’i përmendësh, andaj mundohem që sa më pak të bëj një mëkat të tillë (vetëm sa për të kuptuar lexuesit kujt i shkruaj). Po shkruan për mallkimin si kategori fetare dhe jep shembuj kur mallkojnë “islamistët” ose “të islamizuarit”.

Unë personalisht jam i gatshëm që t’i jap edhe zemrën ambasadorit Hill, nëse atij i duhet që të vazhdojë t’ju ndihmojë shqiptarëve, por këtë “hoxhë” e pyes së ku merr të drejtë të ngatërrojë mallkimin në islam me një besimtarë të krishterë që gjoja i paska mallkuar tre figura shqiptare me të cilët ai ka arritur të plotësojë misionin e tij.

Madje, informatat për mallkimin që u paska bërë Surroit, Bukoshit dhe Xhaferit ambasadori Hill, ky hoxhë i paska marrë nga Abdurahman Haliti dhe njerëz të tjerë përreth tij (gënjeshtari për ta bërë gënjeshtrën më bindëse i fut në lojë edhe të tjerët). Po na mban ligjërata fetare dhe kombëtare, duke na transmetuar njerëz të cilët sot po dalin se i paskan shërbyer një sistemi antishqiptarë dhe antimusliman. Jo ata që i përmend ai, po shokët e tyre të ngushtë dhe shokët e ngushtë të Lamallarit jo më shumë se para një jave na rezultuan si më antishqiptarë.

“Hoxha” u mundua të na shpjegojë emocionet kur ka dalë prej xhamie dhe ka marr peshqesh të vogël pas lutjeve që ka bërë dhe thotë se nuk e ka qëllimin aty. E shohim sa nuk e paska qëllim, saqë edhe pas aq vitesh ende i paska mbetur plagë në zemër pse s’ka marrë më shumë dhe prandaj qenka detyruar të shkojë në Londër, sepse këtu paska qenë i kënaqur me atë që fiton. He he he heeeee në Londër paska shkuar të hajë bukë e kos.

“Hoxha” i shan ata që janë në opozitë në momente të caktuara dhe na i lavdëron pushtetarët, çfarë koincidencë. Jo, jo, s’paska asnjë interes ky njeri që 3 muaj para zgjedhjeve kthehet në Atdhe dhe ik përsëri i turpëruar me 20-30 votat e tij. Shkruan për teori konspiracioni në vitet 1997.

E paska informuar Haliti se Xhaferi i ka kërkuar Gligorovit që të godet Gostivarin (sa i rëndësishëm që paska qenë ky hoxha atëbotë. Merreni me mend, edhe Haliti i paska ndenjur gatitu).

“Profeti” ynë Llam - llami paska paralajmëruar Pranverën shqiptare në Shkup? Hoxhë me baterij, nga ata që thonin se kush se din turqishten do të hyjë në xhehnem.

Dhe fare në fund, Lamallari na tregoka se paska kodosh më të mëdhenj se këta që kanë dalë sot. E di që nuk është anëtarë i komisionit për lustrim, e as agjent i CIA-s, por nuk e di nëse është agjent i shërbimeve sllave që po trillon kaq shumë. Për fund, dua vetëm t’i sugjeroj që përpara se të përmend emrin e Arben Xhaferit, fillimisht të merr abdes. Nuk duhet ta ngatërrojë legjitimitetin e tij dhe partisë që më gjatë se kushdoqoftë tjetër ka mbijetuar në skenën politike shqiptare në Maqedoni, me legjitimitetin e tij personal.

Nëse jo më shumë, Xhaferi qoftë si deputet, qoftë si kryetar i PDSH-së ka siguruar në vazhdimësi mandate deputeti. E nëse ty, o “hoxhë” rrenci të duket kjo e lehtë dhe e vogël, na trego pse t’i për 5 herë radhazi bashkë me shokët e tu që vini 3 muaj para çdo cikli zgjedhor nuk arrini të fitoni as një këshilltarë komunal.

E sa për istikafin, që nuk ka dallim nga lustrimi që po ndodh sot, më vjen keq për gjërat që po ai  i sheh për jetën dhe veprimtarinë e tij vetpëlqyese, por unë s’mund t’i ndihmoj. E ka kapur mallkimi i Zotit dhe i besimtarëve, prandaj ai shqetësohet aq shumë. Unë për dallim nga “hoxhallarët” (pse a ke qenë ndonjëherë hoxhë) e llojit të Lamallari mund vetëm të lutem që Zoti t’ia lehtësojë dhimbjet intelektualit dhe ideologut Arbën Xhaferi, t’i zgjatë jetën, ndërsa nuk do të bëj të njëjtin gabim që në këto ditë agjërimi të mallkoj dikë, po qoftë edhe njerëzit që keqpërdorin emrin e Zotit për përfitime të dështuara politike. Nuk do ta bëj këtë gabim, por vetëm sa për t’i treguar se si duhet sillet një musliman (e le më një hoxhë), do t’i lutem Zotit që këtij robi t’ia hap sytë, ta udhëzojë në rrugë të mbarë dhe ta largojë na rrugët e Iblisit.

(Përgjigje ndaj shkrimit të Musa Lamallarit, "Kush i ka mallkuar Veton Surroin, Bujar Bukoshin dhe Arben Xhaferin?")