Dështon përpjekja e tretë për formimin e Qeverisë së re greke

Ka dështuar edhe përpjekja e fundit nga PASOK për formimin e koalicionit qeveritar në Greqi, pas zgjedhjeve të 6 majit. 

Mandatari Evangelos Venizelos nga PASOK nuk ka arritur që ta takojë liderin e partisë së dytë fituese SIRIZA, Aleksis Cipras, pasi që ky i fundit kishte refuzuar mbrëmë realizimin e një takimi. 

Cipras ka theksuar se nuk do të hyjë në asnjë qeveri, duke kritikuar kushtet e vendosura nga plani shpëtimtarë ndërkombëtarë për Greqinë, që sipas tij, ajo janë shterpe. 

Ndërkohë, lideri i PASOK, Venizelos deklaroi se sot do të kthejë mandatin tek presidenti i vendit Papulias. Pas këtij vendimi, presidenti Papulias pritet të thirrë Këshillin e liderëve politik për të shqyrtuar mundësinë e formimit të një Qeverie të unitetit kombëtar. 

Faktori vendimtar për formimin e një Qeverie të qëndrueshme është partia SIRIZA, e cila ka arritur që të renditet si subjekti i dytë dhe vendimtar në skenën politike greke. 

Nea Demokratia ka ftuar SIRIZA që të formojnë Qeverinë e shpëtimit dhe se vendi duhet të sigurohet për të qenë pjesë e eurozonës. (INA)