Greqi - shpërndahet parlamenti, zgjedhjet më 17 qershor

Doli sot në ora 9:00 në mëngjes dekreti presidencial që shpërndan parlamentin e zgjedhur në votimet e 6 Majit dhe shpall zgjedhjet e reja, më 17 qershor 2012. 

Që sot fillon zyrtarisht fushata elektorale e partive politike greke. Kjo do të jetë një fushatë e ethshme, ku partitë e njohura si forca "antimemorandum", të cilët premtojnë qëndrim në euro por njëherësh rreken të bindin qytetarët se është shansi i tyre historik për t’iu thënë “jo” përfundimisht masave të ashpra të kursimit, ndërsa partitë DRe dhe PASOK vazhdojnë të këmbëngulin se ky lloj votimi është fatal për vendin, i cili do të gjendet jashtë euros dhe i shkatërruar. 

Shpresa e vetme është që 17 në qershor pjesëmarrja në votime të jetë më e lartë për të bërë një diferencë të qartë dhe që zgjedhësit të vendosin për kë do të votojnë, pasi të kenë kuptuar të vërtetën e hidhur, se qëndrimi në euro dhe politika e kursimeve, janë dy anët e së njëjtës medalje. 

Çdo ditë ka raporte se evropianët po marrin në konsideratë skenare të mundshme për dalje të Greqisë nga eurozona dhe gjithë sytë janë kthyer drejt Athinës dhe rezultatit të zgjedhjeve, që do të dalë mbrëmjen e 17 qershorit. 

Një sondazh i ri i kryer nga kompania RASH dhe i publikuar sot në gazetën Metro, nxjerr sërish në vend të parë koalicionin e së majtës radikale SYRIZA, e me një diferencë prej 1.5 % me Demokracinë e re. 

Kështu SYRIZA ka marrë 21.7%, e ndjekur nga Demokracia e Re me 20.2% dhe 11.7% me PASOK.  Në sondazh, duket një rënie e partisë Grekët e pavarur në 7.35%, Partia Komuniste me 5.55% dhe Agim i Artë me 3.7% sërish bëhet forcë parlamentare. (BW/INA)