Në “Ditët e Mbretëreshës Teuta” në Zagreb

Me rastin e manifestimit “Ditët e Mbretëreshës Teuta” në Zagreb të Kroacisë, u promovua libri i autores Sanije Gashi, “Historia e krimit”, gazetare dhe kryeredaktore e revistës “Teuta” nga Prishtina.

Autorja në këtë libër ka përfshirë e përshkruar tregimet dhe rrëfimet e ngjarjeve më të llahtarshme të periudhës shumëvjeçare gjenocidiale të pushtetit serb në Kosovë, që është pjesë e hidhur e historisë së popullit shqiptar, ku dalin në shesh fakte të panjohura mbi këto ngjarje të tmerrshme.

Protagoniste kryesore të ngjarjeve dhe rrëfimeve në këtë libër janë gratë, që kanë pësuar terror të paparë dhe kanë humbur më të dashurit dhe më të afërmit e tyre në pragun e vatrës-shtëpisë, gjatë luftës së imponuar nga okupatori serb, gjatë 1998/99.

Sanije Gashi, është mysafirja e tretë nga Kosova, në bibliotekën “Bogdan Ogrizoviq” në Zagreb, pas Nekibe Kelmendit dhe Flora Brovinës, të cilat kanë qënë mysafire të Klubit të grave shqiptare në Kroaci “Mbretëresha Teuta” dhe kanë animuar opinionin kroat dhe ate botëror për luftën e grave shqiptare në Kosovë për pavarësi.

Ky promovim është bërë nën patronatin e Ambasadës së Republikës së Kosovës në Kroaci dhe ambasadorit Valdet Sadiku, në organizim të Klubit të gruas shqiptare në Kroaci, “Mbretëresha Teuta”.

Në këtë promovim, ku fjalën e hapjes në këtë promovim e mbajti drejtoresha e bibliotekës, e cila librin e cilësoi si një botim të veçantë, pos dashamirëve të fjalës së shkruar-librit, në mesin e shumë mysafirëve të pranishëm ishin edhe ambasadori i Republikës së Shqipërisë në Kroaci, Pëllumb Qazimi, këshilltarja për kulturë pranë kësaj Ambasade, Meri Shahini, Arta Kallaba- përfaqësuese e Ministrisë së rinisë, sportit dhe diasporës së Republikës së Kosovës, Ermira Lekaj, anëtare e Forumit të intelektualëve në Kroaci e shumë e shumë personalitete tjera të jetës shoqërore, politike e shkencore të Kroacisë. (M.L/INA)