Arrestohet dhe lirohet djali i Jonuz Musliut

Shqipërim Musliu, djali i kryetarit të Kuvendit komunal të Bujanocit, Jonuz Musliu është arrestuar dje pasdite në vendkalimin kufitar Tabanoc ng ana e policisë serbe. 

Mirëpo, ai sot pasdite është lënë i lirë  dhe se autoritetet serbe në Vranjë kanë sqaruar shkaqet e arrestit. 

Policia e Vranjës informoi sot se arsyeja e arrestimit të 23 vjeçarit ishte se ai ngarkohej për kryerjen e një vepre penale – shkaktim të lëndimeve trupore dhe se nuk ishte paraqitur pranë autoriteteve gjyqësore në Bujanoc. 

Shqipërimi dje u arrestua derisa po kthehej nga studimet që po vijonte në Universitetin Shtetëror të Tetovës. 

Jonuz Musliu ka shtuar dje se nuk kishte arritur që të sigurojë asnjë informacion zyrtar nga ana e autoriteteve serbe, edhe përkundër përpjekjeve për të kontaktuar me Beogradin dhe zyrtarët e pikës kufitare në Preshevë, me qëllim të njohjes së arsyetimit të arrestimit. Jonuz Musliu është i njohur edhe si ish-përfaqësues politik i UÇPMB-së në Luginën e Preshevës.(Rijad Demiri/INA)