Greqia jashtë euros, bankat përgatiten për hyrjen e dhrahmisë

Ndërsa rriten paralajmërimet e partnerëve për dalje të Greqisë nga euro, bankat e huaja kanë filluar të përgatiten për skenarin e përdorimit të dhrahmisë. Kështu sipas mediave ndërkombetare Reuters dhe The Times, Kina dhe Britania kanë porositur bankat e veta, të jenë gati për hyrjen në përdorim të monedhës greke madje edhe për falimentimin e Greqisë. 

Orët e fundit  pati disa deklarata të forta nga ministri francez i Financave, komisioneri evropian për ekonominë apo zëdhënësi i ministrisë gjermane të Financave, të cilët i kujtonin Greqisë angazhimet e mara dhe rrezikun që e pret në rast të injorimit të tyre. Në sfondin e ndërhyrjeve politike, po bëhen përgatitjet praktike për mundësinë e daljes së Greqisë nga eurozona. 

Qeveria kineze i kërkoi Bankës Qëndrore të Kinës dhe institucioneve të tjera ekonomike të përgatisin plane emergjence dhe të detajojnë masat e nevojshme, në mënyrë që dalja e mundshme të Greqisë nga Eurozona, të mos ketë pasoja në monedhën vendase, juan. Sipas burimeve të Reuters, masat mund të përfshijnë kontrolle mbi lëvizjet e kapitalit. 

Gazeta “The Times” njofton se Autoriteti britanik i Sherbimeve Financiare iu ka kërkuar të gjitha bankave britanike të vlerësojnë kreditin dhe rrezikun operacional në ekonomitë rajonale të eurozonës. 

Në Greqi banka britanike HSBC filloi kontrollin mbi ATM-të, për të përcaktuar nëse ato mund t’iu shërbejnë nevojave për kartëmonedha dhrahmi, kur vendi të largohet nga eurozona. Zëdhënësi i HSBC ka konfirmuar se, si të gjitha bankat, edhe kjo bankë është përgatitur në shumë nivele për të marrë në konsideratë falimentimin ose daljen e Greqisë nga euro. Banka ka 15 degë në Greqi. 

Standard&Poor’s

Ndërkaq agjencia ndërkombëtare e normimit Standard&Poor’s vlerëson se “shanset e daljes së Greqisë nga eurozona në muajt e ardhshëm janë "të paktën një në tre", dhe kjo do të çonte vendin në falimentim. "Kjo mund të ndodhë nëse Greqia kundërshton reformat e kërkuara nga ana e Treshes”, thotë agjencia, gjë që do të pasonte me pezullimin e ndihmës së huaj financiare. "Ky rezultat, sipas mendimit tonë, do të dëmtojë seriozisht ekonominë greke dhe ka të ngjarë të çojë në falimentimin e Greqisë", vlerëson Standard&Poor’s.

Deklaratat paralajmëruese për Greqinë

Tronditëse ishin deklaratat e ministrit francez të Financave dje, sipas të cilit nëse grekët nuk respektojnë angazhimet e tyre, pa dyshim dalja e Greqisë nga euro do të diskutohet. 

Komisioneri për Ekonominë, Olli Rehn tha se vendi duhet të respektojë angazhimet e veta. 

Sipas zëdhënësit të ministrisë gjermane të Financave, Martin Kotchaous po bëhen të gjitha përpjekjet për të mbajtur Greqinë në zonën Euro, por me 2 parakushte: Një qeveri e qëndrueshme nga zgjedhjet dhe zbatimi i angazhimeve për të cilat është rënë dakord. 

(Anila Jole/BW)