“Agimi i Artë” kërcënon me depërtimin e fëmijëve të emigrantëve

Partia e djathtë greke radikale “Agimi i Artë” ka kërcënuar se do të përjashtojë dhe deportojë fëmijët e emigrantëve nga spitalet dhe kopshtet e fëmijëve, në rast se kjo parti hyn në Parlament në zgjedhjet e së dielës. 

Këtë porosi kjo parti e ka përcjellur gjatë mitingut elektoral në Athinë, ndërsa është përcjellur me ovacione dhe duartrokitje nga masa e tubuar. 

“Në rast se ne hyjmë në Parlament, do të kryejmë kontrolle nëpër spitale dhe kopshte të fëmijëve për të përjashtuar emigrantët dhe fëmijët e tyre në rrugë, pasi që në vendet e tyre do të vijnë grekët”, ka theksuar Ilias Panagiataros. 

Zgjedhësit grek të dielën sërish do të dalin në votime, për shkak të dështimit për të zgjedhur qeverinë nga zgjedhjet e 6 majit. Partia “Agimi i Artë” në zgjedhjet e fundit fitoi 7 për qind të votave. Kjo parti ka rritur rejtingun për shkak të pakënaqësisë së qytetarëve ndaj politikave të partive kryesore greke. “Agimi i Artë” akuzohet për sulme të dhunshme kundër emigrantëve, ndërsa ithtarët e saj kanë marrë pjesë në përleshjet me të majtët dhe anarkistët. (INA)