Rama – Idrizi: Presidenti i ardhshëm qëndrim të qartë për çështjen çame

Presidenti i ardhshëm i shtetit shqiptar duhet të ketë një profil të qartë publik dhe politik dhe me vokacion politik, i cili gjithashtu duhet të ketë qëndrim të qartë për çështjen çame. 

Kjo është theksuar nga ana e kreut të Partisë për Drejtësi Integrim dhe Unitet, Shpëtim Idrizi, pas një takimi me kreun socialist Edi Rama, lidhur me zhvillimin e dialogut politik në vend dhe çështjen e zgjedhjes së presidentit koncensual në Shqipëri. 

“Në takim nuk është folur për emra të përveçëm për president, ndërsa theksoi se presidenti i ri duhet të ketë një profil të qartë publik dhe politik, konsensual dhe gjithëpërfshirës, të ketë vokacion patriotik. Një nga kriteret që presidenti i ri duhet të përmbushë është edhe mbajtja e një qëndrimi të qartë për zgjidhjen e çështjes çame”, theksoi Idrizi, duke përshëndetur klimën e re të dialogut ndërshqiptar në Tiranë. 

Kryesocialisti Rama ka theksuar se sfida e integrimit të vendit në Bashkimin Europian kalon përmes zgjedhjes së presidentit të ri të vendit.

“Ne duam që të eksplorojmë çdo mundësi për të ndërtuar një proces dhe nga ky procesi të shkojmë tek emri dhe jo anasjelltas. Qëllimi ynë është t`i përgjigjemi kësaj sfide madhore për Shqipërinë sepse nga mënyra se si do të zgjidhet presidenti do të varet statusi i kandidatit, rrugëtimi ynë evropian për institucione të pavarura, varet një garanci më shumë për palët që presidenti në zgjedhjet e ardhshme të jetë i pa anshëm. Konsensus, në rradhë të parë për statusin. Dhe për këtë ne jemi të angazhuar që të hapim një dialog, dhe dialogu për çështje politike, që nuk zgjidhen në një llogore apo në një tjetër, bëhet me kundërshtarët. Në rast të kundërt do të mbeteshim në pozicionet e mbajtjes së monologjeve, duke mos bërë detyrën tonë karshi vendit dhe miqve që përfaqësojnë familjen e madhe evropiane ” theksoi Rama. (INA)