Studentët kërkojnë Kadarenë për President

Këshilli studentor i Universitetit të Shkodrës përmes një letre publike ka kërkuar që shkrimtari i madh shqiptar Ismail Kadare të jetë kandidatura për president të Shqipërisë.

Këshilli ka apeluar që të gjithë shoqatat studentore të përkrahin kërkesën dhe apelin e tyre, duke theksuar se në këtë periudhë të krizës dhe konfliktit politik në Shqipëri, duhet të jetë një figurë unike dhe jo politike që duhet të drejtojë presidencën në të ardhmen. 

"Ne, duke besuar në vlerat tuaja reale: letrare, artistike, kulturore, patriotike dhe humane, jemi të bindur plotësisht se Ju jeni njeriu i duhur në kohën më të pafavorshme, që keni në duar fatin e së ardhmes së vendit të shqiponjave dhe popullit të vuajtur shqiptar. E kaluara komuniste dhe kinse demokracia e sotme në vendin tonë e kanë sfilitur deri në palcë njeriun e ndershëm shqiptar, duke e ulur malsorin jo vetëm përpara kokrrës së misrit dhe qytetarin përpara ryshfetit të ditës, por duke e zhveshur krejtësisht me çka ka njeriun-shqiptar: duke e katandisur në mjerim dhe vuajtje sociale, pamundësi arsimore, liri dhe shprehje të kufizuar dhe dhunë verbale ndaj antikonformizmit etj. Kjo kohë e turbullt, e paqartë për ne shqiptarët, e krijuar nga një politikbërje aspak produktive dhe e papërgjegjshme për fatin e kombit tonë, kërkon një drejtim të ri, krejt ndryshe nga sa jemi mësuar deri më tani. Koha dhe situata ju thërret Ju. Ne kemi besim te përgjegjshmëria Juaj", thuhet në apelin drejtuar shkrimtarit Kadare.

Studentët theksojnë se besojnë tek forca e vullnetit dhe angazhimit të Kadaresë për t'i ardhur në ndihmë popullit shqiptar. 

"Zoti Ismail Kadare, të nisur nga ndjenjat e larta patriotike dhe me synimin e vetëm për t'i ardhur në ndihmë si dhe sa mundemi vendit dhe qytetarëve tanë, ju shprehim mendimin tonë se ndërhyrja Juaj në këtë situatë të rëndë për fatin e demokracisë së vendit tonë është një domosdoshmëri urgjente. Nga ana tjetër ne shprehim konsideratën tonë të thellë se profili Juaj është profili i një Presidenti të Republikës së Shqipërisë. Jepjani këtë kënaqësi shqiptarëve të ndershëm dhe interesave të tyre kombëtare!", thuhet në letrën drejtuar shkrimtarit Ismail Kadare. (INA)