Berisha: Mund të shtyhet votimi për presidentin

Kryeministri Sali Berisha bëri të ditur sot se negociatat për Presidentitn do të vijojnë dhe do të shtrihen më gjerësisht se marrëveshja me LSI. 

"Pavarësisht se marrëveshja e 2 shtatorit të vitit 2009 përcakton angazhimin e PD dhe LSI për ta zgjedhur me mirëkuptim Presidentin e Republikës ne jemi shumë të vendosur që këtë mirëkuptim ta shtrijmë në gjithë spektrin parlamentar dhe ta arrijmë me një kandidaturë që votohet gjerësisht. Unë do e ftoj opozitën sepse gjykoj që është dhe interesi i saj më i mirë në investim. Duhet votëbesimi që bëhet nga gjithë spektri politik”, theksoi Berisha. 

Ai ka theksuar se janë në kërkim të konsensusit, dhe në rast se nuk arrihet, do shtyhet votimi. 

I pyetur për një takim me Ramën, Berisha është shprehur se "marrëveshjet më të rëndësishme i kemi arritur dhe pa u takuar, nuk perben problem". 

Lidhur me takimin me Dulen, Berisha është shprehur se është në dijeni për lobimin që PBDNJ bën për Fatos Nanon. Kreu i PBDNJ-së, Vangjel Dule deklaroi qartë se presidenti i ardhshëm duhet të dalë nga radhët e politikës, ndërsa shtoi se opinioni tashmë duhet të ishte njohur me emrat që propozojnë palët për këtë post.  Ai shtoi më tej se kandidatura e Fatos Nanos ka shumë gjasa të gjejë konsensusin e palëve për të qenë kreu i ri i shtetit. (BW/INA)