Sot takimi Berisha - Rama për Presidentin

Konfirmohet takimi mes Kryeministrit, Sali Berisha dhe liderit të Partisë Socialiste, Edi Rama për çështjen e Presidentit. 

Burime të Top Channel treguan pak para mesnatës së djeshme se takimi mes tyre do të mbahet të dielën në orën 20:30 të mbrëmjes në mjediset e Kryesisë së Kuvendit.

Mësohet se pas takimeve qe kryeministri Berisha pati të premten në Vlorë, ku shoqërohej nga nënkryetari i PD-së dhe deputeti i këtij qarku, Astrit Patozi, ky i fundit i ka telefonuar homologut të tij socialist, Gramoz Ruçi. 

Ky takim mes Berishës dhe Ramës shikohet si mundësi për të gjetur kompromisin për një kandidat konsensual për president. 

Nuk dihet nëse shefi i qeverisë do të këmbëngulë siç edhe deklaroi një natë më parë që kandidati për president të jetë emri i përzgjedhur nga maxhoranca, Xhezair Zaganjori, apo në takimin me Ramën mund të flitet edhe për emra të tjerë të mundshëm. (INA)