Berisha takohet sot me Edi Ramën

Kryeministri Sali Berisha dhe kreu i PS Edi Rama takohen sot në orën 20.30 minuta për të diskutuar në lidhje me presidentin. 

Takimi mes dy liderëve të politikës shqiptare do të mbahet në kryesinë e Kuvendit, ndërsa në takim do të marrin pjesë edhe dy krerët e grupeve parlamentare Astrit Patozi dhe Gramoz Ruçi. 

Si kryetar partie, Sali Berisha është ulur me Edi Ramën në vitin 2007, kur nuk arritën të zbatonin një marrëveshje për president konsensual dhe në 2010-ën për reformën zgjedhore.

Kryetari socialist Edi Rama e kishte kërkuar një takim të tillë që në fund të muajit prill, por kryeministri shmangu vazhdimisht një takim me zotin Rama duke mos e konsideruar të nevojshëm dhe duke preferuar bisedime në nivel të kryetarëve të grupeve parlamentare apo përmes kanaleve të tjera ndërmjetësuese, ndërkohë që mblodhi disa herë aleatët e tij.

Kërkesa e socialistëve për të diskutuar edhe për çështjet e reformës zgjedhore dhe asaj parlamentare si dhe për imunitetet nga njëra anë, dhe propozimi nga ana tjetër i shumicës për kandidaturën e anëtarit të gjykatës kushtetuese Xhezair Zaganjori ishin argumentat e betejës mediatike që palët konsumonin kundër njëra tjetrës.

Ndërkohë në takimin e sotëm nuk dihet nëse kryeministri Berisha do të këmbëngulë për kandidaturën e zotit Zaganjori, apo në tryezë do të hidhen edhe emra të tjerë si kandidatë për presidentin e ri të vendit. 

Takimi i sotëm do të jetë përcaktues nëse mazhoranca dhe opozita do të shkojnë me një emër të përbashkët në raundin e dytë të votimit për presidentin që është nesër, më 4 qershor.(INA)